Búgin elimizdiń birneshe aımaǵynda aýa raıynyń qolaısyzdyǵyna baılanysty mektepter qashyqtan oqytý formatyna aýystyryldy, dep habarlaıdy "Adyrna" ulttyq portaly.
Astana qalasynda 0-den 9-synypqa deıingi 1-aýysymdaǵy oqýshylar onlaın oqýǵa kóshti. Bul týraly resmı habarlamany Astana qalasy ákimdiginiń monıtorıng jáne jedel áreket etý ortalyǵy seısenbi keshinde taratty.
"2025 jyldyń 22 qańtarynda aýa raıynyń qolaısyzdyǵyna baılanysty 1-aýysymdaǵy 0-9 synyp oqýshylary qashyqtan oqytý formatyna kóshedi", – delingen habarlamada.
Pavlodar oblysynda da qolaısyz aýa raıyna baılanysty oqýshylar qashyqtan oqytý formatyna aýystyryldy.
Qatty jeldiń kúsheıýine (ekpini 21 m/s deıin) baılanysty Aqsý qalasy men aýyldyq aımaqta 2025 jyldyń 22 qańtarynda 1-aýysymdaǵy 0-4 synyp oqýshylary qashyqtan oqytý formatyna kóshirildi. Bul 3123 balany qamtıdy. Osyǵan baılanysty mektepke jetkizý toqtatyldy.
Sondaı-aq Pavlodar qalasyndaǵy mektepterdiń 1-aýysymdaǵy sabaǵy toqtatyldy. Mektepke deıingi jáne 1-11 synyp oqýshylary qashyqtan oqytýǵa jiberildi.
Bul shekteýler 9-synyp bazasynda oqıtyn 1-2 kýrs pavlodarlyq stýdentterine de qatysty. Abaı oblysynda da qolaısyz aýa raıyna baılanysty 1-aýysymdaǵy oqýshylar úshin sabaqtar toqtatyldy.
