Işkı ıster ministrlıgı Şerzat Polattyŋ äkesı Qarjaubai Nūrymovqa qatysty qozǧalǧan qylmystyq ıstıŋ män-jaiyn mälımdedı, dep habarlaidy "Adyrna" ūlttyq portaly Informburo.kz portalyna sılteme jasap.
Ministrlıktıŋ mälımetınşe, Qarjaubai Nūrymov "qoǧamdyq orynda qūqyqqa qaişy äreketter jasaǧany" üşın ūstalǧan. Qazırgı uaqytta "polisiia qyzmetkerlerıne zorlyq-zombylyq jasau qaupı" boiynşa qylmystyq ıs qozǧalǧan. Is odan ärı tergeu üşın Almaty oblysy boiynşa Sybailas jemqorlyqqa qarsy ıs-qimyl agenttıgıne jıberıldı.
Būǧan deiın oblystyq polisiia departamentı Nūrymovqa qatysty "bötennıŋ mülkıne qasaqana zaqym keltıru" faktısı boiynşa ıs qozǧalǧanyn mälımdegen bolatyn. 10 jeltoqsanda Eŋbekşıqazaq audanynyŋ Azat auylynda bolǧan oqiǧa barysynda bır azamatqa materialdyq şyǧyn kelgenı anyqtaldy. Būl äreket äkımşılık jauapkerşılık şegınen asyp, qylmystyq ıs qozǧauǧa negız boldy.
Eske sala keteiık, Talǧarda oryn alǧan jappai töbeles saldarynan 16 jastaǧy Şerzat Polat qaza tapqan edı. Oqiǧadan keiın Şerzattyŋ otbasy auyr qaiǧyly jaǧdailarǧa tap boldy: olardyŋ üiı belgısız bıreuler tarapynan örtelıp, keiın Şerzattyŋ aǧasy Nūrǧanat Ǧaiypbaevtyŋ denesı tabylǧan.
Qarjaubai Nūrymov 9 jeltoqsanda jurnalisterdı şaqyryp, narazylyǧyn bıldırıp, qolyna pyşaq alyp, özıne qol jūmsaitynyn aitqan soŋ ūstaldy. Ol “būzaqylyq” baby boiynşa 15 täulıkke qamauǧa alynǧan bolatyn.
Sotqa deiıngı tergeu jalǧasyp jatyr, al ıstıŋ män-jaiy qosymşa tergeu nätijesınde naqtylanatyn bolady.
Ūqsas jaŋalyqtar
