Ahou, Gvineia-Bisau. Qazaqstan astyǧy Afrika asady

Qazaqstan Prezidentı Qasym-Jomart Toqaev pen Gvineia-Bisau prezidentı Umaru Sisoku Embalo resmi kelıssözderdıŋ qorytyndysy boiynşa BAQ ökılderıne arnalǧan brifingte ekı el arasyndaǧy yntymaqtastyqty nyǧaitatyn baǧyttardy atap öttı, dep habarlaidy "Adyrna" ūlttyq portaly Aqorda baspasöz qyzmetıne sılteme jasap. Memleket basşysy geografiialyq qaşyqtyqqa qaramastan, ekı eldı ortaq maqsattar men ūmtylystardyŋ bırıktıretının aitty. Kelıssözder barysynda serıktestıktıŋ negızgı baǧyttary talqylandy. Erekşe nazar kölık-logistika salasyna audaryldy. Prezidentter Bisau portyn Transkaspii kölık dälızımen bailanystyru mümkındıgın zertteu turaly kelısımge keldı, būl azyq-tülık qauıpsızdıgın qamtamasyz etuge jäne ekonomikalyq bailanystardy damytuǧa yqpal etuı mümkın. Qasym-Jomart Toqaev auyl şaruaşylyǧy salasyndaǧy yntymaqtastyqty tereŋdetudı ūsyndy. Qazaqstannyŋ Gvineia-Bisauǧa astyq eksporttau äleuetınıŋ zor ekenın atap öttı. Basqa salalardyŋ ışınde ol temır, fosfat jäne sirek kezdesetın metaldardy barlau jäne igeru boiynşa tau-ken önerkäsıbındegı yntymaqtastyqty atady. Qazaqstan Prezidentı Gvineia-Bisau delegasiiasyn Astana halyqaralyq forumyna qatysuǧa şaqyryp, osy eldıŋ jastaryna qazaqstandyq universitetterde bılım aludy ūsyndy. Taraptar halyqaralyq mäselelerdı talqylap, Bırıkken Ūlttar Ūiymy men Afrika Odaǧy aiasyndaǧy özara ıs-qimyldyŋ maŋyzdylyǧyn toqtaldy. «Bızdı jahandyq beibıtşılık pen öŋırlık tūraqtylyqty qoldau boiynşa ortaq ūstanymymyz bırıktıredı. Jalpy, jan-jaqty qarym-qatynastardy nyǧaitu üşın keŋ mümkındıkter bar. Bügıngı maŋyzdy kelısımder – sonyŋ aiqyn dälelı. Umaru Sisoku Embalo myrzanyŋ sapary Qazaqstan men Gvineia-Bisau arasyndaǧy yntymaqtastyqqa jaŋa serpın beretınıne senımdımın», – dedı Toqaev. Öz kezegınde Gvineia-Bisau Prezidentı bılım beru, kömırsutekterdı eksporttau jäne tabiǧi resurstardy igeru salalaryndaǧy serıktestık äleuetıne toqtaldy. «Qazaqstan men Gvineia-Bisau tabiǧi resurstardy barlau, bılım beru jäne kömırsutekterdı eksporttau siiaqty salalarda özara ıs-qimyldy jandandyru üşın qajettı tetıkterge ie. Sondai-aq bız ärtürlı halyqaralyq platformalar aiasyndaǧy bailanystardy tereŋdetuge jäne köpqyrly qarym-qatynastarymyzdy ılgerıletuge müddelımız», – dedı Umaru Sisoku Embalo.