Qazaqstan Prezıdenti Qasym-Jomart Toqaev pen Gvıneıa-Bısaý prezıdenti Ýmarý Sısoký Embalo resmı kelissózderdiń qorytyndysy boıynsha BAQ ókilderine arnalǵan brıfıngte eki el arasyndaǵy yntymaqtastyqty nyǵaıtatyn baǵyttardy atap ótti, dep habarlaıdy "Adyrna" ulttyq portaly Aqorda baspasóz qyzmetine silteme jasap.
Memleket basshysy geografııalyq qashyqtyqqa qaramastan, eki eldi ortaq maqsattar men umtylystardyń biriktiretinin aıtty.
Kelissózder barysynda seriktestiktiń negizgi baǵyttary talqylandy. Erekshe nazar kólik-logıstıka salasyna aýdaryldy. Prezıdentter Bısaý portyn Transkaspıı kólik dálizimen baılanystyrý múmkindigin zertteý týraly kelisimge keldi, bul azyq-túlik qaýipsizdigin qamtamasyz etýge jáne ekonomıkalyq baılanystardy damytýǵa yqpal etýi múmkin.
Qasym-Jomart Toqaev aýyl sharýashylyǵy salasyndaǵy yntymaqtastyqty tereńdetýdi usyndy. Qazaqstannyń Gvıneıa-Bısaýǵa astyq eksporttaý áleýetiniń zor ekenin atap ótti. Basqa salalardyń ishinde ol temir, fosfat jáne sırek kezdesetin metaldardy barlaý jáne ıgerý boıynsha taý-ken ónerkásibindegi yntymaqtastyqty atady.
Qazaqstan Prezıdenti Gvıneıa-Bısaý delegaııasyn Astana halyqaralyq forýmyna qatysýǵa shaqyryp, osy eldiń jastaryna qazaqstandyq ýnıversıtetterde bilim alýdy usyndy.
Taraptar halyqaralyq máselelerdi talqylap, Birikken Ulttar Uıymy men Afrıka Odaǵy aıasyndaǵy ózara is-qımyldyń mańyzdylyǵyn toqtaldy.
«Bizdi jahandyq beıbitshilik pen óńirlik turaqtylyqty qoldaý boıynsha ortaq ustanymymyz biriktiredi. Jalpy, jan-jaqty qarym-qatynastardy nyǵaıtý úshin keń múmkindikter bar. Búgingi mańyzdy kelisimder – sonyń aıqyn dáleli. Ýmarý Sısoký Embalo myrzanyń sapary Qazaqstan men Gvıneıa-Bısaý arasyndaǵy yntymaqtastyqqa jańa serpin beretinine senimdimin», – dedi Toqaev.
Óz kezeginde Gvıneıa-Bısaý Prezıdenti bilim berý, kómirsýtekterdi eksporttaý jáne tabıǵı resýrstardy ıgerý salalaryndaǵy seriktestik áleýetine toqtaldy.
«Qazaqstan men Gvıneıa-Bısaý tabıǵı resýrstardy barlaý, bilim berý jáne kómirsýtekterdi eksporttaý sııaqty salalarda ózara is-qımyldy jandandyrý úshin qajetti tetikterge ıe. Sondaı-aq biz ártúrli halyqaralyq platformalar aıasyndaǵy baılanystardy tereńdetýge jáne kópqyrly qarym-qatynastarymyzdy ilgeriletýge múddelimiz», – dedi Ýmarý Sısoký Embalo.
