Bügın äsem ünımen milliondaǧan körermennıŋ jüregın jaulaǧan opera änşısı, Sosialistık Eŋbek Erı, KSRO jäne Qazaq KSR halyq ärtısı Bibıgül Ahmetqyzy 95 jasqa toldy, dep habarlaidy «Adyrna» tılşısı.
Aty aŋyzǧa ainalǧan öner iesı 1929 jyly Semei qalasynda düniege kelgen. Almaty memlekettık konservatoriiasyn (Qūrmanǧazy atyndaǧy Qazaq ūlttyq konservatoriiasy) bıtırgen. Öner jolyn körkemönerpazdar üiırmesınen bastaǧan. Halyq ärtısı älemnıŋ eŋ üzdık orkestrlerı — Osipov atyndaǧy orys ūlttyq akademiialyq ūlt aspaptar orkestrı, Chaikovskii atyndaǧy ülken simfoniialyq orkestrı, prins Uelskiidıŋ (Ūlybritaniia) kameralyq orkestrımen bırge än salǧan.
1991 jyldyŋ 21 jeltoqsanynda KSRO prezidentınıŋ qaulysymen Bibıgül Tölegenovaǧa muzyka önerınıŋ damuyna qosqan ülken ülesı üşın Lenin atyndaǧy ordenı jäne «Balǧa men oraq» medalımen qatar Sosialistık Eŋbek erı ataǧy berıldı. «Eŋbek Qyzyl tu» ordenımen, Lenin atyndaǧy ordenmen ekı märte marapattalǧan. Bibıgül Ahmetqyzy özınıŋ 70 jyldan asa şyǧarmaşylyq jolynda jüzdegen operalyq partiialardy oryndap, “Dala qyzy", "Bızdıŋ süiıktı därıger", "Būl Şūǧylada bolǧan", "Taqiialy perışte" filmderınde özındık beinelerın jasady.
