Astana qalasynyŋ audanaralyq azamattyq ıster jönındegı soty Öskemen qalasynyŋ zaŋgerı Serıkjan Ahmetjanovtyŋ Qazaqstanda bıryŋǧai uaqyt beldeuın engızu mäselesı boiynşa ükımetke qarsy bergen talabyn qaraudy bastady, dep habarlaidy "Adyrna" ūlttyq portaly Ūlysmediaǧa sıltep.
Serıkjan Ahmetjanov ükımettıŋ qaulysyna qarsy şaǧym tüsırıp, Şyǧys Qazaqstan oblysynyŋ bırde-bır ökılınıŋ būl mäsele boiynşa jūmys tobyna kırmegenın mälımdedı. Onyŋ aituynşa, uaqyt beldeuınıŋ özgerısı tıkelei äser etken aimaqtardyŋ pıkırı mülde eskerılmegen.
«Uaqyt beldeuınıŋ auysuy köptegen infraqūrylymdyq mäselelerdı tudyrady. Mysaly, qysta saǧat 15:00-den keiın qaraŋǧy tüsedı, bıraq būl uaqytta ömır süru belsendılıgı jalǧasady. Tiıstı infraqūrylym, onyŋ ışınde köşe jaryǧy men äleumettık nysandardyŋ jaryqtandyryluy daiyn boluy kerek edı. Būl şeşımdı jergılıktı ökıldermen talqylau qajet bolǧan», – dedı Ahmetjanov.
Sotta zaŋger Densaulyq saqtau ministrlıgınıŋ zertteulerıne süienıp, adamnyŋ tabiǧi biologiialyq uaqytyna säikes kelmeitın uaqyt beldeuınde ömır süru densaulyqqa kerı äser etetının atap öttı. Ol mūndai şeşımderdıŋ Konstitusiianyŋ 14-babyn būzatynyn aitty, onda azamattardy kemsıtpeu qaǧidasy bekıtılgen.
«Şyǧys Qazaqstan oblysynyŋ 724 myŋ tūrǧyny säikes uaqyt beldeuınde ömır süru qūqyǧynan aiyrylǧan. Būl tıkelei kemsıtuşılık», – dep mälımdedı Ahmetjanov.
Sonymen qatar, zaŋger qaulyny qabyldau kezınde sarapşylar men öŋırlerdıŋ ökılderımen aldyn ala talqylau jürgızılmegenın, būl Konstitusiianyŋ 3-babyndaǧy bilıktıŋ negızgı közı halyq degen qaǧidany būzatynyn atap öttı.
2024 jyldyŋ 1 nauryzynan bastap Qazaqstanda bıryŋǧai uaqyt beldeuı engızıldı. Bıraq būl şeşım qoǧamda qarsylyq tudyrdy. 3 aidan keiın uaqytty būrynǧy küiıne qaitarudy talap etken petisiiaǧa 50 myŋnan astam adam qol qoidy. Degenmen, būl talap qabyldanǧan joq.
Serıkjan Ahmetjanov qaulyny zaŋsyz dep tanyp, uaqyt beldeuı mäselesın halyqpen bırge talqylaudy talap etude.
Ūqsas jaŋalyqtar
