Астана қаласының ауданаралық азаматтық істер жөніндегі соты Өскемен қаласының заңгері Серікжан Ахметжановтың Қазақстанда бірыңғай уақыт белдеуін енгізу мәселесі бойынша үкіметке қарсы берген талабын қарауды бастады, деп хабарлайды "Адырна" ұлттық порталы Ұлысмедиаға сілтеп.
Серікжан Ахметжанов үкіметтің қаулысына қарсы шағым түсіріп, Шығыс Қазақстан облысының бірде-бір өкілінің бұл мәселе бойынша жұмыс тобына кірмегенін мәлімдеді. Оның айтуынша, уақыт белдеуінің өзгерісі тікелей әсер еткен аймақтардың пікірі мүлде ескерілмеген.
«Уақыт белдеуінің ауысуы көптеген инфрақұрылымдық мәселелерді тудырады. Мысалы, қыста сағат 15:00-ден кейін қараңғы түседі, бірақ бұл уақытта өмір сүру белсенділігі жалғасады. Тиісті инфрақұрылым, оның ішінде көше жарығы мен әлеуметтік нысандардың жарықтандырылуы дайын болуы керек еді. Бұл шешімді жергілікті өкілдермен талқылау қажет болған», – деді Ахметжанов.
Сотта заңгер Денсаулық сақтау министрлігінің зерттеулеріне сүйеніп, адамның табиғи биологиялық уақытына сәйкес келмейтін уақыт белдеуінде өмір сүру денсаулыққа кері әсер ететінін атап өтті. Ол мұндай шешімдердің Конституцияның 14-бабын бұзатынын айтты, онда азаматтарды кемсітпеу қағидасы бекітілген.
«Шығыс Қазақстан облысының 724 мың тұрғыны сәйкес уақыт белдеуінде өмір сүру құқығынан айырылған. Бұл тікелей кемсітушілік», – деп мәлімдеді Ахметжанов.
Сонымен қатар, заңгер қаулыны қабылдау кезінде сарапшылар мен өңірлердің өкілдерімен алдын ала талқылау жүргізілмегенін, бұл Конституцияның 3-бабындағы биліктің негізгі көзі халық деген қағиданы бұзатынын атап өтті.
2024 жылдың 1 наурызынан бастап Қазақстанда бірыңғай уақыт белдеуі енгізілді. Бірақ бұл шешім қоғамда қарсылық тудырды. 3 айдан кейін уақытты бұрынғы күйіне қайтаруды талап еткен петицияға 50 мыңнан астам адам қол қойды. Дегенмен, бұл талап қабылданған жоқ.
Серікжан Ахметжанов қаулыны заңсыз деп танып, уақыт белдеуі мәселесін халықпен бірге талқылауды талап етуде.
