Esimizde áli. Maqanshynyń baǵyna bitken qos kók at boldy. «Arqaldy» sovhozynyń atynan synǵa túsip, olja salǵan janýarlar jyl on eki aı babynda bolatyn. Kók jorǵany kósiltip minetin N.Qaspaqov, tipti asfalt ústinde sý tógilmeıtin júrisimen jurtty tánti etetin.
Zekenniń kógi qysy-jazy jeginde júrse de, jarys kezinde aldyna júırik túsirmeıtin. Zeken ata izin baǵyp, babynan bir jańylmaıtyn attyń tabıǵatynan syr shertýin ótinip barǵanymyz da bar. «Jylqy jaryqtyq kıeli janýar ǵoı, – dep sóz bastaǵan kánigi atbegi, – Osy Kók at ózin-ózi jaratady», – degendi aıtty. Sodan soń: «Maısa shóp pen sulyǵa shekteý joq. Sýdyń da tazasyn beremiz. Qansha ishý, qansha jeýdi ózi mólsherleıdi. Keıde qazy alady. Artynsha jarap ketedi. Babymen júretin zaman ba bul? Jazda arba, qysta shana tartady», – dedi.
Jáne shana bolǵanda qandaı! Birde shóp taýsylyp, Zeken aqsaqal sovhoz basshylaryna barady. Qar erip keledi. «DT tirkemeseń tarta almaıdy. Berýin beremiz. Jetkizýin ózińizge qaldyrdyq» dese kerek. Kók atty shanaǵa jekken qart taıaý jerdegi maıanyń birine baryp, jalǵyz ózi shóp tıeı bastaıdy. «Shal qansha asha artar» deısińmen, bir top jigit syrtynan qarap turypty. Maıanyń biraz mólsheri shanaǵa qotarylǵanda da aqsaqal belin jazyp, demalmaǵan. «Bul kisi atyn óltiretin boldy» dep báıge kókke jany ashyǵandar tabylady. Sol tusta keńshar basshylary da júrse kerek. «Áı, aqsaqal, sonsha ne kórindi. Shóp jetkizemin deısiń, janýardyń obalyna qalmaısyń ba?» degender daýysy estilgen shaqta, «ol jaǵyn Kók at ekeýmizge qoıa ber. Kómektesken joqsyńdar. Tym bolmasa demep, shananyń ústine shyǵýyma kómektes» depti ılikpeı. Shómele sekildengen shópke jaıǵasqan soń, tizgindi aqyryn ǵana qozǵap qalady. Qar erip jatqan kez dedik qoı. Kók at bir yshqynyp, shananyń tabanyn qara jerge janyp, tas jolǵa bir-aq shyǵypty. Álgi kórinistiń kýási bolǵandar Kók atqa da, Zeken qartqa da rıza bolysypty.
Bul kez kelgen aýylda kezdesetin oqıǵa shyǵar. Tarbaǵataıdyń tasynan qaırat ala ma, álde qaıraq tastar tuıaǵyn bekitip, jigerin oıata ma? Aqsýat jaqta da ne júırik attar ıesine bedel ákeldi. Erke jıren men elik jıren respýblıkalyq jarystarda júldege ilindi. Keıin shaý tartqanda qos jırenniń birin sharýashylyq etke ótkizedi. Semeı et kombınatynyń mańynda jaıylysqa shyǵarǵanda janýar qorshaýdan qarǵyp ótip, Tarbaǵataıǵa tartyp ketipti. Jol arasy 700 shaqyrymdaı. It-qusqa jem bolady. Áldebireý ustap alǵan bolar dep eshkim sońynan túspeıdi. Kúnderdiń kúninde júdegen jıren jem jeıtin qorasynyń aldyna kelip tur deıdi. Osynyń ózi jylqy qasıetine taptyrmas qazyq.
Amankeldi Seıthan, “Alash aınasy”
