AQSh-tyń Qazaqstandaǵy elshisi Denıel Rozenblıým 2025 jylǵy 20 qańtarda óz qyzmetin aıaqtap, AQSh Memlekettik departamentindegi 28 jylǵa jýyq mansabyn támamdaıtynyn málimdedi, dep habarlaıdy "Adyrna" ulttyq portaly.
Bul týraly AQSh-tyń Qazaqstandaǵy elshiligi men konsýldyǵynyń baspasóz qyzmeti habarlady.
«Qazaqstandaǵy AQSh elshisi Denıel Rozenblıým 26 qarashada Qazaqstan úkimetine 2025 jylǵy 20 qańtarda qyzmetinen ketetinin jáne AQSh Memlekettik departamentindegi 28 jylǵa jýyq tabysty mansabyn aıaqtaıtynyn habarlady», – delingen málimdemede.
Rozenblıým AQSh-tyń Qazaqstandaǵy elshiligin 2022 jylǵy qarashadan beri basqaryp keledi. Ol AQSh Memlekettik departamentindegi mansabyn aıaqtaýǵa sheshim qabyldaǵan. Elshiniń mansaby bes prezıdent ákimshiligi men segiz memlekettik hatshyny qamtıdy. Ol AQSh pen Qazaqstan arasyndaǵy nyǵaıa túsken ári damý ústindegi qarym-qatynastar aıasynda elde qyzmet etý múmkindigi úshin alǵysyn bildirdi.
«Qazaqstandaǵy AQSh elshisi bolý men úshin úlken mártebe boldy. Men ásirese qazaqstandyq halyqty jaqynnan tanyp, eldiń barlyq óńirlerine sapar jasap, onyń biregeı tarıhy týraly kóp nárse bilgenime qýanyshtymyn. Munda jumys istegen ýaqytymda men Qazaqstannyń mádenıeti men dástúrlerine tereń qurmetpen qaradym», – dedi elshi.
Eske sala ketsek, 20 qańtarda Donald Tramp AQSh-tyń 47 prezıdenti retinde ulyqtaý rásimin ótkizip, qyzmetine kirispek.
