Qazirgi zamanda áleýmettik jelilersiz ómir súrý múmkin emesteı kórinedi. Instagram, TikTok, Facebook sekildi platformalar kúndelikti qarym-qatynas quralyna aınalyp, jańalyq pen kóńil kóterýdiń basty kózine aınaldy. Alaıda, áleýmettik jelilerge shekten tys áýestený – jańa zamannyń jasyryn dertine aınalyp otyr.
2023 jylǵy zertteýlergE súıensek, Qazaqstan halqynyń 60%-dan astamy áleýmettik jelilerde kún saıyn birneshe saǵattan ýaqyt ótkizedi. Ásirese, jastar arasynda bul kórsetkish joǵary. Kóptegen adamdar óz ýaqytyn vırtýaldy álemde ótkizip, shynaıy ómirdegi qarym-qatynastardy umyta bastaıdy. Bul jaǵdaı adamnyń psıhologııalyq densaýlyǵyna keri áser etedi. Basqalardyń ıdealǵa aınalǵan ómirin baqylaý, únemi laık pen pikirge táýeldi bolý – óz-ózine degen senimsizdik pen kúızeliske alyp keledi.
Sonymen qatar, áleýmettik jelige táýeldilik tek psıhologııalyq máselelerge ǵana emes, fızıkalyq densaýlyqqa da áser etedi. Uzaq ýaqyt boıy ekran aldynda otyrý kózdiń kórý qabiletine zııan tıgizedi, al fızıkalyq belsendiliktiń tómendeýi artyq salmaq pen basqa da densaýlyq problemalaryn týdyrýy múmkin. Uıqynyń buzylýy, júıkeniń sharshaýy jáne jalǵyzdyq sezimi de áleýmettik jelilerdiń shekten tys qoldanylýymen tikeleı baılanysty.
Áleýmettik jelilerdiń artyqshylyqtaryn joqqa shyǵarý múmkin emes. Olar adamdardy baılanystyrady, aqparat taratady, jańa múmkindikter usynady. Alaıda, vırtýaldy álemge shekten tys berilý shynaıy ómirdegi mańyzdy qundylyqtardy joǵaltýǵa ákeledi. Ómirdegi teńgerimdi saqtap, áleýmettik jelini baqylaýda ustaý – densaýlyqty saqtaýdyń jáne psıhologııalyq turaqtylyqty qamtamasyz etýdiń basty joly.
Shynaıy ómirdegi qarym-qatynas pen tájirıbe – vırtýaldy álemnen áldeqaıda qundy. Sondyqtan áleýmettik jelilerde ýaqytty shekteý, shynaıy ómirge nazar aýdarý arqyly adam óz ómirin baıyta alady.
