24 qarasha kúni Almaty qalasynda XVII halyqaralyq «Eýrazııa» kınofestıvaliniń saltanatty ashylýy ótti, dep habarlaıdy «Adyrna» tilshisi.
Kınofestıval qatysýshylaryna prezıdent Qasym-Jomart Toqaev arnaıy quttyqtaý hatyn joldady. Hatty Mádenıet jáne aqparat mınıstri Aıda Balaeva oqyp berdi. Memleket basshysynyń hatynda elde ulttyq kınematografııany qoldaýǵa basa mán berilip otyrǵany atap ótilgen.
«Eýrazııa» kınofestıvali Qazaqstan men búkil Ortalyq Azııanyń mańyzdy mádenı brendine aınaldy. Bul rette álemge áıgili sheteldik kınogerler men sarapshylarden quralǵan qazylar alqasyna erekshe toqtala ketkim keledi.
Festıval baǵdarlamasynda eki negizgi baıqaý boldy. Halyqaralyq baıqaýǵa Kann kınofestıvalinde «Altyn palma butaǵyn» ıelengen álemdik kınonyń ańyzy Nýrı Bilge Jeılan jetekshilik etti. Qazylar alqasynyń quramynda Rano Shodıeva (Ózbekstan), Nada Ajarı Gıllon (Franııa), Artyqpaı Súıindikov (Qyrǵyzstan) jáne Erlan Nurmuhambetov (Qazaqstan) bar.
Al Ortalyq Azııa men Túrki álemi elderiniń baıqaýyna qytaılyq rejısser Lı Baohýa tóraǵalyq etti. Fılmderdi Abdelıla El Djaýharı (Marokko), Alekseı Telnov (Reseı) jáne qazaqstandyq prodıýser Janna Qýanyshova baǵalaıdy.
Sonymen qatar, qazylar alqasynyń qatarynda Nına Kochelıaeva (Reseı), Gúlbara Tólómúshova (Qyrǵyzstan) jáne Andre Rafael Ivanov (Franııa) bar.
Saltanatty ashylý rásimi aldynda biz qazylar alqasynyń múshelerimen birge yntymaqtastyq múmkindikterin talqyladyq. Barlyq qatysýshylar birlese jumys isteýge daıyn ekenin jetkizdi. Bul yntymaqtastyq qazaq kınosynyń damýyna jańa ıdeıalar men perspektıvalar ákeletinine senimdimin»,—dedi Aıda Balaeva.
Halyqaralyq «Eýrazııa» kınofestıvali 24-30 qarasha aralyǵynda ótedi. Festıvalge 15-ten astam el qatysyp jatyr.
