Álemge áıgili Frankfýrt kitap jármeńkesiniń ókilderi almatylyq kitaphanalarmen, baspalarmen jáne jazýshylarmen yntymaqtastyq ornatýǵa qyzyǵýshylyq tanytty.
Almaty qalasynyń ákimi Erbolat Dosaev Frankfurter Buchmesse prezıdenti jáne atqarýshy dırektory Iýrgen Boosty qabyldady.
Kezdesý barysynda Frankfýrt tarapy Almatynyń kópultty qala retindegi biregeıligin atap ótip, uzaq merzimdi áriptestik qarym-qatynas ornatýǵa nıet bildirdi. Óz kezeginde Erbolat Dosaev ákimdik tarapynan kitaphanalardy jańǵyrtýǵa jáne zamanaýı qoǵamdyq keńistikter qurýǵa erekshe kóńil bólinetinin aıtty. Sondaı-aq Almaty qalasynyń kitaphanalarynda tabysty engizilgen ınnovaııalyq jáne kreatıvti sheshimder týraly baıandady.
«Elektrondy kitaptardy paıdalaný úrdisiniń artýyna qaramastan, baspa kitaptaryn oqý sezimin, qaǵaz betterin ustap kórý áserin eshteńe almastyra almaıtynyna senimdimin. Kitaphanalardyń belsendiliginen bizdiń turǵyndarymyzdyń kitapty óte jaqsy kóretinin baıqaımyz, biz bul baǵytta belsendi jumys istep jatyrmyz. Búginde qalamyzdaǵy kitaphanalardyń 95%-y jańǵyrtyldy. Biz barlyq aýdanda zamanaýı kitaphanalar ashyp, halyq kóp jınalatyn jerlerde – saýda jáne oıyn-saýyq ortalyqtarynda, komıýnıtı ortalyqtarynda jáne basqa oryndarda avtonomdy kitaphanalar ornatyp jatyrmyz. Sonymen qatar, jazýshylar men zamanaýı avtorlardy qoldaımyz», – dedi Almaty ákimi Erbolat Dosaev.
Frankfýrt kitap jármeńkesiniń prezıdenti jáne atqarýshy dırektory Iýrgen Boos Almatyda jergilikti avtorlar men baspalarǵa arnalǵan semınarlar ótkizýge, sondaı-aq aýqymdy kitap is-sharalaryn uıymdastyrýda keńes berýge daıyn ekenin bildirdi.
«Biz Qazaqstanǵa arnaıy keldik. Almatymen baılanys jasap, yntymaqtastyq ornatý biz úshin mańyzdy. Biz tek jármeńkeler ótkizýmen shektelmeı, baspa isin de damytamyz. Men baspa salasy úlken ózgeristerdi qajet etedi dep sanaımyn jáne osy salada tájirıbe almasýǵa daıynbyz. Buǵan deıin biz Meksıkada, Ońtústik Afrıka Respýblıkasynda jáne BAÁ-de ótken kitap jármeńkeleriniń uıymdastyrýshylaryn keńes berip qoldadyq. Iaǵnı, bul salada mol tájirıbemiz bar. Sondaı-aq, Qazaqstandy Frankfýrt kitap jármeńkesiniń qurmetti qonaǵy bolýǵa shaqyrǵymyz keledi», – dedi Iýrgen Boos.
Kezdesý sońynda taraptar 2025 jyly Almatyda birlesken jobalardy damytý jáne mádenı-iskerlik baılanystardy nyǵaıtý týraly ýaǵdalasty.
