Serebraldy sal auruy, psihikalyq damudyŋ tejeluı, sirek kezdesetın genetikalyq jäne özge de dertterge şaldyqqan balalar men eresekter Almaty oblysy Talǧar audandyq Mädeniet üiınde ötken «Jürekten jürekke» atty oblystyq şyǧarmaşylyq festivalıne qatysty.
Is-şaraǧa qatysuşylarǧa jas şekteuı qoiylǧan joq. Irıkteu kezeŋderınen ötken oblys tūrǧyndary özıne degen senımdılıktı, küş-jıger men ömırge degen şynaiy süiıspenşılıktı paş etıp, bır sahnada öner körsettı.
Mysaly, Jambyl audanynan kelıp qatysqan Akbota Jalǧasbai men Bekjan Bazarqūldyŋ oryndauyndaǧy «Aǧa men qaryndas» änı körermenderge erekşe äser syilady. Būl duet dostyq pen özara tüsınıstıktıŋ, şabyt pen bauyrmaldyqtyŋ simvolyna ainaldy.
Festivaldıŋ eŋ jas qatysuşysy Konaev qalasynan kelgen jetı jastaǧy Dias Quandyq boldy. Onyŋ önerı men özın sahnada ūstai bıluı körermenderdıŋ jüregın eljıretıp, jürekten jürekterge jettı.
Festivaldı Almaty oblysynyŋ äkımdıgı men oblystyq halyq şyǧarmaşylyǧy ortalyǧy bırlese ūiymdastyrdy. Şaranyŋ saltanatty aşyluynda oblystyq Mäslihat töraǧasy Quat Baiǧojaev pen Talǧar audanynyŋ äkımı Taŋat Aidarbekov qūttyqtau söz söilep, mūndai bastamalardyŋ erekşe qajettılıkterı bar jandardyŋ şyǧarmaşylyq äleuetın aşuǧa jäne qoǧam ömırıne belsene aralasuyna mümkındık beretının, sondai-aq qoǧamdaǧy meiırımdılık pen özara süiıspenşılıktı arttyruǧa zor yqpal etetının aitty.
Barlyq qatysuşylar oblys äkımı Marat Sūltanǧazievtıŋ atynan alǧys hattarmen marapattaldy, sondai-aq şyǧarmaşylyq üiırmelerdı ūiymdastyruşylar ūsynǧan aqşalai yntalandyrular men estelık syilyqtar aldy.
