2024 jyldyń 12 qarashasynda Qaraǵandy qalasyndaǵy N. Ábdirov atyndaǵy sport kesheninde “Qaraǵandy oblysynyń ulttyq sport túrleri qaýymdastyǵynyń” alqa otyrysy ótti. Sharaǵa Qaraǵandy oblysy ákiminiń orynbasary Álibek Áldeneı tóraǵalyq etti.
Jıynda ulttyq sport túrlerin damytý boıynsha atqarylǵan jumystar men aldaǵy josparlar talqylandy. Daýys berý nátıjesinde Qaraǵandy oblystyq máslıhatynyń tóraǵasy Núrken Qobjanov qaýymdastyqtyń jańa prezıdenti bolyp saılandy. Atqarýshy dırektor laýazymyna Temirhan Abylaev taǵaıyndaldy.
Qaýymdastyqtyń negizgi baǵyttary:
- Kókpar, báıge, aýdaryspaq, toǵyzqumalaq, jamby atý sııaqty 10 ulttyq sport túrin damytý;
- Respýblıkalyq jáne halyqaralyq jarystar uıymdastyrý;
- Qajetti ınfraqurylym qurý jáne ulttyq sportty nasıhattaý;
- Jastardy ulttyq sportqa baýlý arqyly patrıottyq tárbıe berý.
Qaýymdastyq aldaǵy ýaqytta Qazaqstan ulttyq sport túrleri qaýymdastyǵymen, QR Týrızm jáne sport mınıstrligimen jáne Ulttyq Olımpıada komıtetimen birlesip jumys atqarýdy josparlap otyr.
Bul bastamalar ulttyq sport túrlerin nasıhattaý arqyly jas urpaqtyń rýhanı jáne mádenı baılyǵyn arttyrýǵa baǵyttalǵan.
