AQSh-tyń jańa saılanǵan prezıdenti Donald Tramp pen Reseı basshysy Vladımır Pýtın telefon arqyly sóılesti degen aqparat shyndyqqa janaspaıdy. Mundaı málimdemeni búgin, 11 qarashada Kremldiń baspasóz hatshysy Dmıtrıı Peskov jasady, dep habarlaıdy «Adyrna» tilshisi.
«Eshqandaı áńgime bolǵan joq. Bul jaı ǵana jalǵan aqparat»,—dedi ol.
Jýrnalıster Kremldiń baspasóz hatshysynan: «Pýtın AQSh-tyń jańa saılanǵan prezıdentimen jaqyn arada qandaı da bir baılanys ornatýdy josparlap otyr ma?» - dep surady. Peskov ázirge naqty jospar joq ekenin jetkizdi.
Buǵan deıin «The Washington Post» gazeti eki el basshysynyń 7 qarasha kúni áńgimeleskeni týraly habar jarııalaǵan bolatyn. Sheteldik BAQ Tramptyń jaǵdaı odan ári órship ketpes úshin Pýtındi shara qabyldaýǵa shaqyrǵanyn, oǵan «Vashıngtonnyń Eýropadaǵy áskerı kúshi» týraly eskertkenin jazǵan edi.
