Qaraǵandy oblysyna qarasty Saran qalasynyń ákimi Erkin Baýlyqov qalada jylý berý maýsymynyń bastalýynda olqylyq jibergeni úshin qyzmetinen bosatyldy. Qala basshysy qyzmetin ýaqytsha Maqsat Qaıreshov atqaratyn boldy. Bul týraly oblystyq ákimdik málimdedi, dep habarlaıdy “Adyrna” ulttyq portaly.
"Qaraǵandy oblysy ákiminiń ókimimen Saran qalasynyń ákimi Erkin Baýlyqov qalada jylý berý maýsymynyń bastalýynda olqylyq jibergeni úshin atqaratyn qyzmetinen bosatyldy", - delingen ákimdiktiń resmı saıtynda jarııalanǵan aqparatta.
Ákimdik málimetinshe, qala basshysy mindetin ýaqytsha osyǵan deıin Saran qalasy ákiminiń orynbasary bolǵan Maqsat Qaıreshov atqarady.
Eske salsaq, buǵan deıin Qaraǵandy oblysyndaǵy Saran qalasynda qala turǵyndary áleýmettik jelide jylýsyz otyrǵanyn aıtyp, shaǵymdanǵan edi. Keıin Saran qalasynyń ákimi Erkin Baýlyqov osy máselege qatysty vıdeoúndeý joldady.
Úkimet otyrysynda osy másele kezekten tys kóterilip, premer-mınıstr Oljas Bektenov qaladaǵy jaǵdaı boıynsha tekseris júrip jatqanyn, tekserý nátıjesi boıynsha materıaldar quqyq qorǵaý organdaryna jiberiletinin aıtty.
Al 16 qazanda Sarandaǵy úılerdi mamandar qaıtadan eski qazandyqtarǵa qosyp jatqany málim boldy. 28 qazanda qyzmettik mindetterin tıisinshe oryndamaǵany úshin, atap aıtqanda, jylytý maýsymyna daıyndyqty jetkiliksiz túrde baqylaǵany úshin Saran qalasynyń ákimi Erkin Baýlyqov pen Qaraǵandy oblysynyń energetıka jáne TKSh basqarmasynyń basshysy Tilektes Dosaev qatań sógis alǵany, al oblys ákiminiń birinshi orynbasary Azamat Taıjanovqa eskertý túrinde tártiptik jaza jarııalanǵany málim boldy.
