Sońǵy tórt jylda 12 myńnan astam qazaqstandyq ultyn ózgertti, dep habarlaıdy «Adyrna» tilshisi Paryz.kz-ke silteme jasap.
Ishki ister mınıstrliginiń málimetinshe, ultyn ózgertý boıynsha eń kóp ótinish 2022 jyldyń sáýiri men 2023 jyldyń tamyzy aralyǵynda bolǵan.
Jeke basyn kýálandyratyn qujattarda ultyn ózgertkisi kelgender sany:
2021 jyly – 3254 adam;
2022 jyly – 3363 adam;
2023 jyly – 3366 adam;
2024 jyly (osy kúnge deıin) – 2158 adam.
«Qazaqstan Respýblıkasy Konstıtýııasynyń 19-babynyń 1-tarmaǵyna sáıkes árkim óziniń ulttyq, partııalyq jáne dinı ustanymyn aıqyndaýǵa jáne kórsetýge nemese kórsetpeýge quqyly. Bul norma quqyqty, ıaǵnı adamnyń óziniń ulttyq ereksheligin anyqtaýǵa jáne kórsetýge baılanysty sýbektıvti múmkindikterin bekitedi»,—dep túsindirdi mınıstrlik.
Qazaqstan azamatynyń ulty ata-anasynyń biriniń ulty boıynsha anyqtalady. Ata-analardyń ulty ártúrli bolǵan jaǵdaıda ony anyqtaýdyń arnaıy tártibi qoldanylady. Iaǵnı, balanyń qalaýy boıynsha ákesiniń nemese anasynyń ultyna sáıkes, oǵan jeke kýálik jáne pasport berý kezinde aıqyndalady. Keıin ultty bir ret ata-ananyń qaı biriniń ultyna ózgertýge bolady.
Resmı málimetke súıensek, qazaqstandyqtar arasynda ultyn “orystan" "nemiske" – 743, "ózbekten" "qazaqqa" – 354, "orystan" "ýkraınǵa" – 300, "ýkraınnan" "orysqa" – 246, "orystan" "qazaqqa" – 118 adam aýystyrǵan.
Aıta keteıik, ultyn ózgertý týraly sheshim eki jumys kúni ishinde shyǵarylady.
