«Qarańǵy qazaq kógine, órmelep shyǵyp, kún bolam!» dep jyrlaǵan Sultanmahmut Toraıǵyrovtyń jolyn úlgi etken «Sun study» balalardy damytý ortalyǵy Astana qalasynda óz jumysyn bastady.
26 qazan kúni balalardy damytýǵa baǵyttalǵan ortalyqtyń resmı ashylý saltanaty ótti. Jıynǵa Ǵylym jáne joǵary bilim mınıstrliginiń Komıtet tóraǵasynyń orynbasary, Hımııa ǵylymdarynyń doktory Aqerke Abylaıhan, QR Ulttyq akademııalyq kitaphana dırektory Ǵazıza Qudaıbergen, Astana qalasyndaǵy Mýzykalyq jas kórermen teatrynyń dırektory, teatr rejıssery Ashat Maemırov syndy elimizdiń betke ustar tulǵalary qatysyp, lentasyn qıyp, izgi tilekterimen bólisti.
Ashylý saltanatyna jınalǵandarǵa án men jyrdan shashý shashylyp, Anvara Áripqyzynyń jetekshiligimen «Gúlder» ansambliniń árticteri Ánel Jumadıldına jáne Alan Muhtar Sholpan Qorǵanbektiń kúıine qoıylǵan «Toqym qaǵar» bıi usynyldy. Búldirshinderge anımatorlar oıyn oınatyp, ártúrli syılyqtar berildi.
«Sun study» balalardy damytý ortalyǵynyń ereksheligi ár bólmeniń qabyrǵasynda Alash arystarynyń sýretteri men ulaǵatty sózderi jazylǵan. Bólmelerge «Álıhan Bókeıhan bólmesi», «Ahmet Baıtursynuly bólmesi», «Mirjaqyp Dýlatuly bólmesi», «Maǵjan Jumabaı bólmesi» degendeı ataýlar qoıylǵan. Árbir bólmege kirgende balalardy uly tulǵalar qarsy alǵandaı áser qaldyrady.
Álıhan men Mirjaqyptyń «ár býyn óz zamanyndaǵy máseleni sheship ketýi kerek. Áıtpegende keıingi urpaqqa óte úlken júk qaldyrady» degen máseleni qosarlana qaıtalaýy olardyń qanshalyqty deńgeıde keler urpaq aldyndaǵy jaýapkershilikti tereń sezinetindikterin kórsetkendeı. Ashylyp jatqan ortalyq osy múddeler údesinen shyǵyp jatsa, bizdiń de Alash amanatyna degen abroıly qyzmetimiz sol bolmaq - deıdi «Sun study» balalardy damytý ortalyǵynyń jetekshisi Arman Áýbákir.
