Aqmola oblysy Astananyń aınalasynda azyq-túlik beldeýin qurýdyń negizgi býyny bolyp sanalady jáne respýblıkadaǵy dándi daqyldardyń tórtten bir bóliginen astamyn óndiredi. Osyndaı uranmen elordada óńir taýar óndirýshileriniń qatysýymen dástúrli aýyl sharýashylyǵy jármeńkesi ótip jatyr. Agrarshylardyń sórelerinde aımaqtyń betke ustar kásiporyndary usynǵan 40-tan astam azyq-túlik túri qoıyldy.
Aqmolalyq óndirýshiler elordaǵa barlyǵy 300 tonnadan astam ónim alyp keldi. Jármeńkedegi ónim baǵasy naryqtaǵydan 10-15 paıyzǵa tómen.
«Bizdiń ónimimizge 20 jyldan astam ýaqyt boıy suranys joǵary. Biz et jáne et ónimderin óndirýmen aınalysamyz», – dep bólisti Býrabaı aýdanynyń «Jas» JShS basshysy Záýre Ǵalıaqparova.
Jármeńke tıimdiligin elordalyq turǵyndardyń usynylǵan ónimniń sapasy, keń assortımenti jáne qoljetimdi baǵalary týraly oń pikiri dáleldeıdi. Astana qalasynyń turǵyny Kúlásh Qojahmetova jármeńkege jyl saıyn keledi.
«Búgin otbasyma unaǵan aqmolalyq óndirýshilerdiń et jáne sút ónimderin satyp ala alǵanyma qýanyshtymyn. Baǵalar men assortıment kóńilimnen shyqty», – dep bólisti K.Qojahmetova.
Oblys ákimi Marat Ahmetjanov jármeńkege alǵashqylardyń biri bolyp kelip, usynylǵan ónimder assortımentimen tanysyp, astanalyqtardyń tilegin tyńdady.
«Demalys kúngi jármeńkelerdi» ótkizý áleýmettik mańyzy bar azyq-túlik baǵasyn turaqtandyrýǵa jáne halyqty naryqtaǵydan 10-15% tómen baǵamen tabıǵı azyq-túlikpen qamtamasyz etýge oń áser etedi. Bul fermerler úshin de tıimdi, óıtkeni deldaldar sany edáýir azaıady», – dep atap ótti oblys ákiminiń orynbasary Murat Balpan.
Aqmola oblysy – turǵyndarǵa ónimderdi jetkizýde kómek kórsetetin eriktileri bar jalǵyz óńir.
Jármeńkedegi eriktiler qyzmeti dástúrge aınalyp keledi. Bul joly da elorda turǵyndarynyń satyp alǵan ónimderin artyp-tıeýge jáne tasymaldaýǵa kómektesken 50-den astam jas volonter keldi. Sondaı-aq, kelýshilerdiń nazaryna óńir ártisteriniń qatysýymen konerttik baǵdarlama usynyldy.
Aıta keteıik, Aqmola oblysy Qazaqstannyń agroónerkásiptik keshenine turaqty túrde eleýli úles qosyp, respýblıka boıynsha dándi daqyldardyń kóp bóligin qamtamasyz etedi. Bıyl óńir 6,6 mıllıon tonna astyq jınap, eldiń astyq ortalyǵy mártebesin taǵy da dáleldedi.
