Aqtóbe oblysynyń Hromtaý jáne Muǵaljar aýdandary prokýratýralary mektepke deıingi mekemelerde 240 mln teńgeden astam bıýdjet qarajatyn talan-tarajǵa salý faktilerin anyqtady. Bul týraly búgin, 21 qazanda oblystyq prokýratýranyń baspasóz qyzmeti aıtty, dep habarlaıdy «Adyrna» tilshisi.
«Bıýdjet qarajattary jumysshylarǵa qosymsha syılyqaqy berýde bıýdjettik ótinimderdi negizsiz joǵarylatý arqyly ıemdenilgen. Baqylaýsyz ózgerister engizilip, onyń ishinde basshylarǵa syılyqaqy berý týraly buıryqtarǵa somalardy asyra kótergen.Iemdenip alý shemalary jalaqyny belgilengen normadan tys aýdarý, aýdarymdardy qaıtalaý, jalǵan issaparlar arqyly júzege asyrylǵan.
Sonymen qatar, esepshilerdiń biri keıbir qyzmetkerlerge joǵarylatylǵan jalaqy, qosarlanǵan eńbek demalysy men issapar tólemderin zańsyz esepteý arqyly jalpy kólemi 24 mln teńgeden astam qarajatty ıemdengen»,—delingen habarlamada.
Aýdan prokýratýralarymen aýdandyq bilim bóliminiń burynǵy basshylaryna, 3 balabaqsha meńgerýshileri men 4 esepshige qatysty QK-tiń 189-babynyń 4-bóliginiń 2-tarmaǵymen (asa iri mólsherde cenip tapsyrylǵan bóten múlikti ıemdenip alý nemese talan-tarajǵa salý) sotqa deıingi tergep-tekserý bastaldy.
Barlyq kórsetilgen fakti boıynsha Sybaılas jemqorlyqqa qarsy kúres qyzmetimen sotqa deıingi tergep-tekserýler júrgizilip jatyr.
