Búgin aqyn ári jýrnalıst Serik Boqan qaıtys boldy, dep habarlaıdy “Adyrna” ulttyq portaly.
2000 jyldary ádebıet tabyldyryǵyn attaǵan qalamger ómirden ótti. Ol Shyǵys Túrkistanda dúnıege kelgen.
«Jas qazaq úni» gazetinde, «Ún» jýrnalynda qyzmet atqarǵan. Respýblıkalyq jyr músháıralarynyń júldegeri. Biraz jyl boıy «Asyl arna» telearnasynda jýrnalıst bop qyzmet etken.
Qaraly habardy dosy Toqtaráli Tańjaryq Facebook paraqshasynda habarlady.
“Keshir, Seke!..
Aqyn dosymyz Serik Boqan qaza bolypty. Myna ómirde eshbir ereje men tıymǵa baǵynýǵa BOLMYSY saı kelmeıtin jandar bolady. Sekeń, Serik Boqan sondaı jan edi. Ol bul ómirdiń qýlyq-sumdyǵyn úırene almaı-aq ketti. Basyn taýǵa da, tasqa da urdy. Aqyry, dinnen marqadam tapty... bálkim, tappady. Ózin kóp izdedi. Ózin syılaıtyn ortany kóp izdedi. Joly bolmady. Únemi tyǵyryqqa tirele berdi. Ózi de meniń aldymnan bir ketpeltek tomar ketpeıdi deýshi edi. Shynymen, tap-taza edi. Tez jaralanǵysh edi. Onysyn bildirmeıtin. Ózin dáleldegisi keletin. Dáleldeı almady. Myna qoǵamda ondaı bólek minez, ózge jaratylys ıesine oryn joq edi. Ózi de tógilip: "Baıaǵy sol jyldar nedegen izgi ediń?!" degenindeı, ol tek Balalyq Shaǵynda ǵana baqytty bolǵan shyǵar.
Jazda Almatyda áldebir bazardan kezigip qap, telefon almasyp, habarlasyp turyp edik. Óleńderin suraǵam. Osy áleýmettik jelide saǵan izdeý salaıyn degem. Kelisken. Óleńderin jibergen. Áńgimeleseıikshi, tek ádebıet týraly degen. Meniń bir óleńimdi qatty súıip oqyǵanyn aıtqan. Amal ne, sol óleńderi ýatsaptyń qýysynda qalypty. Kóp óleńi joǵalǵan shyǵar. Áı, saqtamady-aý...
Qazirshe bir óleńin jarııalap qoıaıyn. Rýhyń shat bolsyn, dosym!” - dep jazdy ol.
