«Almaty Finance» enşıles ūiymy (Almaty ÄKK kompaniialar tobyna kıredı) «Almaty» MQŪ aǧymdaǧy jyldyŋ 9 aiynda almatylyqtarǧa şaǧyn jäne mikrobiznestı damytu üşın 80-nen astam jeŋıldetılgen nesie berdı.
Nesielerdıŋ eŋ köp bölıgın öndırıs jäne öŋdeu (30%), densaulyq saqtau (17%), bılım beru (10%), halyqqa qyzmet körsetu (10%), turizm (6%), äleumettık käsıpkerlık (6%), sonymen qatar kreativtı ekonomika (5%) salalarynda jobalary bar käsıpkerler alǧan.
Körsetılıp otyrǧan kezeŋdegı qarjylandyrudyŋ jalpy somasy 2,6 mlrd teŋgeden asty.
Käsıbın endı bastaǧan jäne tūraqty jūmys ıstep jürgen käsıpkerlerge «Almaty Business-2025» öŋırlık käsıpkerlıktı damytu baǧdarlamasy aiasynda jyldyq 2% jäne 6% jeŋıldıkpen nesie berıldı. Aqşa jabdyqty, şikızatty satyp aluǧa, ainalym qarajatyn tolyqtyruǧa jäne basqa da biznes qajettılıkterın jabuǧa bölınedı.
«Almaty» MQŪ-nyŋ 7 jyldyq merzımge deiın beretın nesiesınıŋ eŋ joǧary somasy 73 840 000 teŋgenı qūraidy.
2019 jyldan bastap 2024 jyldyŋ 3 toqsanyna deiın «Almaty» MQŪ barlyǧy 12,5 mlrd teŋgege juyq somaǧa 560-tan astam şaǧyn jäne mikro biznes jobalaryn qarjylandyrdy.
««Almaty» MQŪ-nyŋ «Almaty Business» baǧdarlamasy boiynşa jeŋıldetılgen nesielendıru aiasynda qalada 2300-den astam jūmys orny aşyldy. Jaŋa käsıpkerlık subektılerınıŋ aşyluymen qatar, baǧdarlama jergılıktı biudjetke salyq tüsımderın arttyruǧa da belsendı yqpal etude», - dep atap öttı «Almaty» MQŪ Basqarma töraǧasy Altai İsmaǧambetov.
