Májilis otyrysynda depýtat Rınat Zaıytov premer-mınıstrdiń atyna saýal joldap, elde LGBT nasıhatyna tyıym salýdy talap etti, dep habarlaıdy “Adyrna” ulttyq portaly.
9 qazan kúni ótken jıynda depýtat Zaıytov LGBT men “Femınıta” uıymy bolashaqtyń tamyryna balta shabady dep pikirin bildirdi.
“Qazaqstan memleketi táýelsizdik alǵaly esiginen doc ta, dushpan da erkin kire bastady. Ol jasyryn emes. Dospen tabysyp, baýyrymyz bútindeldi dep qýanǵanymyzben, aram pıǵyldaryn iske asyrýǵa kelgen dushpandar, janymyzdy aýyrtyp júregimizdi julýǵa sál qalyp tur.
Solardyń biregeıi qazaq jastaryn azǵyndatyp, bolashaǵymyzdyń tamyryna balta shapqysy keletin álemdik deńgeıdegi jaýyz uıym – LGBT men femınıta qaýymdastyǵy. Az ǵana ýaqytta jastarymyzdy azǵyndyqqa jetektegen jeksuryn uıymdar búginde memlekettiń áreketsizdiginen ábden basqa shaýyp, tóske órledi”, – deıdi ol.
Depýtat atalǵan uıym óńirlerdi aralap, kámeletke tolmaǵandarǵa óz nasıhattaryn ashyq júrgizgen sátte quqyq qorǵaý organdary tek qarap otyrǵanyn aıtty.
“Osydan keıin esh jazaǵa tartylmasyna kózi jetken azǵyndar kúni keshe Almatyda Quryltaı ótkizetinin ashyq habarlady. Álmısaqtan el men jerdiń, ulys pen ulttyń taǵdyry talqylanatyn quryltaı degen qasterli uǵymdy osynsha tómendetkende biz nege qarap qalýymyz kerek?! Memleket basshysynyń ózi úılestirgen elimizdiń Ulttyq Quryltaıynyń mańyzy men maǵynasyna nuqsan keltiretin bul femınıta azǵyndaryna nege toqtaý joq?! Olardyń artynda kim tur, olarǵa qarjy bóletin kimder jáne olardyń kózdegen túp maqsaty ne?
Sonda qalaı?! Ánsheıinde kez-kelgen máseleni maı shammen qaraıtyn quqyq qorǵaý organdary, LGBT uıymyna kelgende "tártipti qaýqarsyz" bola qala ma?” – dep qosty Zaıytov.
Sondaı-aq, Rınat Zaıytov "Ekstremızmge qarsy is-qımyl týraly" № 31 Zańynyń 1-babyna sáıkes femınıta qaýymdastyǵyna Qazaqstan Respýblıkasynyń aýmaǵynda shekteý qoıýdy jáne LGBT-ny nasıhattaýǵa tolyqtaı tyıym salýdy talap etti.
