Parlament Senatynyń Tóraǵasy Máýlen Áshimbaev bastaǵan AES salýdy qoldaý jónindegi halyq shtabynyń músheleri Abaı oblysyna keldi. Aýylsharýashylyq ónimderin óndirýshilermen, bilim berý salasynyń mamandarymen jáne kommýnaldyq qyzmetter salasyndaǵy eńbek ujymdarymen kezdesken olar ekologııalyq jáne ekonomıkalyq problemalardy sheshý jolynda AES salýdyń mańyzyna toqtaldy.
Máýlen Áshimbaev óz sózinde qazirgi tańda klımattyń ózgerýine jáne ekologııanyń nasharlaýyna baılanysty búkil álem túrli syn-qatermen betpe-bet kelip otyrǵanyna nazar aýdardy. Sondaı-aq ol ýaqyt ótken saıyn elektr energııasynyń tapshylyǵy artyp otyrǵanyn tilge tıek etti. Búginde elimizdegi energııa óndirisiniń negizgi kólemi, ıaǵnı 70 paıyzdan astamy kómir elektr stansalaryna táýeldi. Shtab músheleri «Prırechnoe agrofırmasy» JShS-nyń bazasynda oblystaǵy aýylsharýashylyq ónimderin óndirýshilermen, «Eıkos» JShS-nyń kásipkerlerimen jáne qyzmetkerlerimen, sondaı-aq, kommýnaldyq sektor kásiporyndarynyń ujymdarymen kezdesýlerde atalǵan máselelerdi talqylady.
«Memleket basshysy Qasym-Jomart Kemeluly Toqaevtyń bastamasymen 6 qazanda Qazaqstanda AES salý máselesine qatysty respýblıkalyq referendým ótedi. Atom elektr stansasy – kómirqyshqyl gazynyń shyǵaryndylaryn jáne kómirge táýeldilikti azaıtýdyń eń tıimdi joldarynyń biri. AES-tiń kómir stansalarynan aıyrmashylyǵy zor. Atalǵan sala qorshaǵan ortany ýly gazdarmen, kúlmen nemese quramynda munaı ónimderi bar zııandy qaldyqtarmen lastamaıdy. Bul – atom energııasy tabıǵatqa zııan keltirmeıtin, ekonomıkamyzdyń damýyna tyń serpin beretin taza jáne turaqty energııa kózimen qamtamasyz etedi degen sóz», – dedi Palata Spıkeri.
Bilim berý salasynyń qyzmetkerlerimen kezdesýde Máýlen Áshimbaev AES salý máselesine keshendi kózqaras qajet ekenin aıtty.
«AES-tiń qaýipsizdik máselesi kópshilikti alańdatyp otyrǵanyn bilemiz. Mundaı alańdaýshylyqqa ótken ǵasyrda bolǵan ıadrolyq synaqtar men apattar sebep ekeni anyq. Osy rette qazirgi atom stansalary senimdi, eń ozyq jáne tekserilgen tehnologııalar arqyly salynyp jatqanyn erekshe atap ótkim keledi. Bul oraıda áńgime III jáne III+ býyndar týraly sóz bolyp otyr. Eger halyq referendýmǵa shyǵarylǵan máseleni qoldasa, elimizde atom elektr stansasy eń joǵary álemdik standarttarǵa saı salynyp, jabdyqtalady. Atalǵan iste adamdardyń qaýipsizdigi negizgi basymdyq bolatyny sózsiz», – dep, Senat Spıkeri azamattardy el ıgiligi úshin referendýmǵa belsendi qatysýǵa shaqyrdy.
Halyqtyq shtabtyń baspasóz qyzmeti
Sýretti túsirgen Álı Ǵalym
Daıyndaǵan: «Nur Media» JShS.
Tapsyrys berýshi: M. J. Ospanov
«AMANAT" partııasy» QB qarajaty esebinen tólendi
