SERIK ELIKBAI. JAR-JAR

802

-Allo. Bul Nurjan ba eken?
-Iá, men.
-Maǵan siz týraly aıtyp edi.  Jaqsy bir tamada kerek.
-Mine qazir esiktiń aldyna shyǵamyn.  Adresimdi aıttym.  Qazir jetemin. Ekeýi úıdiń janyndaǵy « Nostalgııa » kafesine kelip kirdi. Syra aldy. Ózi ishken joq.
-Atym Asan. Óziń de kórip otyrsyń ǵoı jasym 35-te. Buǵan deıin bir ret úılendim.  Jeti jyl birge turdyq. Bala bolmady. Jaman turǵan joqpyz. Biraq sheshem qulaq etimdi jep qoıdy. Bala, bala dep. Aıaǵynda ajyrasyp tyndyq.
Osy bıyl, tamyz aıynda qazirgi úılenbek jaryma jolyqtym. Kelinińe.
-Jeńge deńiz.
-Durys, durys saǵan jeńge ǵoı. Jap – jas. Áp – ádemi. Shynyn aıtý kerek. Bir
bıznesmen jigit aldap ketipti. Men ózim zaýytta kezekshilik bastyǵymyn. Shúkir aqsham jetedi. Al mynaý aqshaly jigitter, qazaqtyń qazaqtyń baıyǵandary ońbaǵan ǵoı. Tıyndary bar, aqshalary bar-arlary joq. Bir-aq kúnde, baıyǵan adamda uıat bolmaıdy ǵoı, bári etpen terimen birge kelgen urlyq, keńes ókimetinen basyp qalǵan dúnıe... Bul súıekpen kelmegen soń solaı bolady da. Bárimiz de solaımyz. Shynyn aıtaıyn, myna jeńgeńe ólip ǵashyqpyn. Buǵan ǵashyq bolmaý múmkin emes. Sondaı ádemi. Minezi ǵajap. Bundaı minez perishtege ǵana tán bolýy kerek. Aseke, Aseke dep turady. Qaı kezde kórsem de tamaǵym daıar, kıimim jýýyly. Eh, nesin aıtasyń. Men ózimdi baqytty sezinip júrmin. Óziń de bir ıman júzdi bala ekensiń. Áli aǵa – baýyr bolyp aralasyp ketemiz. Qudaı biledi jeńgeń eshkimdi jatsynbaıdy. Sosyn taǵy bir aıtarym, bolashaq jarymnyń aıaǵy aýyr bolyp keldi. Men aldyrtpadym. Kim bolsa da ákesi qazaq ǵoı.
Nurjan tań qaldy. Iá, ıá bireýler óz balasynan qashyp jatqanda myna jigittikti. Naǵyz,erlik, naǵyz qazaqtyń jesiri men jetimin jatqa bermes baýyrlas minez alp – alp basqan aǵalar – aı.
Toı bolar kún de ońaı syrǵyp jetti. Qala ortasyndaǵy « Saryarqa » meıramhanasynda kisi tym kóp eken.
Asan ol, « jaqsy ótsin » dep aqshasyn aldyn – ala berip tastady. Betashardyń aqshasy da ózińdiki dep eskertti.
- Nureke,  osy toıda aıanarym joq endi. Bir este qalardaı qylyp ótkizshi. Mýzykattaryńdy, bıshilerińdi de rıza jasaımyn.  Qajet bolsa taǵy da aqsha beremin. Jetpese aıt,  baýyrym.
Asyqpas alash jıylyp bolǵanda Nurjan óleń joldaryn josylyp jóneldi. Tólegenniń « Bir toıymy » mynaý eńseli, saltanatty zalda sańqyldaı estilip, elitip ketti.
Jańǵyrtyp jar-jar...jandy aldy.
- Atamyz kúıeý bolǵan, anamyz kelin bolǵan qazaqpyz. Ortaǵa kelin, kelsin.
Asyqpaı naıqala basqan kelinniń sulbasy Nurjanǵa tanystaı kórindi. Betasharǵa kerek tizimdi bir qarap shyqqan tamada dombyrasyn qutyrta soǵyp, asqaq ánmen... eski jolmen tartty.
Al aǵaıyn, qazaqtyń qasıetti qara dombyrasymen aq kelinniń, pák kelinniń betin ashamyn. Dombyra
saǵaǵy jaılap kelinniń betin asha berdi.
Nurjannyń aldynda Sánish tur edi. Iá, ıá jaz boıy birge júrgen, qyzyq ýaqpen ýaz keshken, ózi bıznesmenmin dep tanysqan Sánishi.
Tanys kóz tanys erin, tanys keýde. Sánish sur qabaqpen jırenip qarap tur eken. « Biraq aıaǵym aýyr » degen joq edi ǵoı...
Sánish buǵan deıin turmysta boldy emes pe...
Toı jaqsy ótti. Basqa eldi qaıdam Asan qatty rıza boldy. Toı sońynda mas bop qaldy...
Rahmet baýyrym, jigitsiń, úıge kel.
Men ózińdeı baýyr taptym degendi...qaıtalap aıta berdi...
Aıta berdi...
Aıta berdi...

Pikirler