Aqmola oblysynda Prezıdent Qasym-Jomart Toqaevtyń bastamasymen «Jaıly mektep» Ulttyq jobasy belsendi júzege asyrylýda. Búgin Qaraótkel aýylynyń 1500 oqýshysy úshin IT baǵytyndaǵy taǵy bir mektep esigin aıqara ashty. Esterińizge sala keteıik, bul elınograd aýdanynda oqý jylynyń basynan beri ashylǵan úshinshi jaıly mektep.
Mektep jaılylyq pen qaýipsizdiktiń barlyq zamanaýı talaptaryna saı keledi. Bilim ordasynda qosymsha bilim berý sabaqtaryn ótkizýge arnalǵan kabınetter, horeografııadan robototehnıkaǵa deıingi ártúrli úıirmeler bar, qaýipsizdik kameralary men dabyl túımeleri ornatylǵan.
Aqmola oblysynyń ákimi Marat Ahmetjanov aýylǵa arnaıy kelip, oqýshylardy mekteptiń ashylýymen quttyqtady.
«Jaıly mektep» jobasy mektepterde oryn tapshylyǵy máselesin sheshedi, oqýshylar men pedagogtar úshin qolaıly jaǵdaı jasaıdy, qalalyq jáne aýyldyq mektepter arasyndaǵy bilim sapasyndaǵy alshaqtyqty azaıtady. Óskeleń urpaqtyń úılesimdi jáne baqytty balalyq shaǵy – jalpyulttyq mindet», - dep atap ótti M.Ahmetjanov.
Jańa bilim berý nysanynyń ashylýymen QR Ishki ister mınıstriniń orynbasary Igor Lepeha da quttyqtady.
«Ótken jyly bizdiń kishkentaı ári jas aýylymyzda elorda mektepterinen esh kem túspeıtin osyndaı zamanaýı jáne ádemi mektep ashylatynyn oılamaǵan edik. Nemeremniń osyndaı mektepte oqıtynyna qýanyshtymyn», - dep bólisti aýyl turǵyny Gúlnur Amanova.
Munda qonaqtarǵa tuńǵysh ashylǵan jas jol ınspektorlarynyń kabıneti, sondaı-aq kámeletke tolmaǵandar arasyndaǵy quqyq buzýshylyqtardyń aldyn alý boıynsha vedomstvoaralyq ózara is-qımyl jáne «Birtutas tárbıe» biryńǵaı tárbıe baǵdarlamasy aıasynda ashylǵan «SKÝD», «Alaqan» mektepterdiń qaýipsizdik júıeleri tanystyryldy. Mundaı synyptyń ashylýy eń aldymen patrıotızm men Otanǵa degen súıispenshilikti tárbıeleýge, mektep ortasynda quqyq buzýshylyqtardyń aldyn alýǵa, oǵan qosa mamandyq tańdaýǵa kómektesýge baǵyttalǵan.
Aıta keteıik, Aqmola oblysynda jyl sońyna deıin 10 mektep, onyń ishinde 6 jaıly mektep ashý josparlanýda.
