Aqtaý qalasynda 11-16 mamyr kúnderi sporttyq jáne jaýyngerlik sambodan kadetter, jasóspirimder, jastar jáne sheberler arasynda Azııa jáne Muhıt jaǵalaýy elderi chempıonaty ótti. Alǵash ret jalaýy túrilgen jarysqa 25 elden 500-ge jýyq sportshy kelip, baq synap, ózara sheberlikterin baıqady. Bes kún boıy sportshylar 62 salmaq dárejesinde jeńimpazdardy anyqtady.
Sary qurlyq elderi arasyndaǵy dúbirli básekeden Túrkistan oblysynyń sportshylary da bos kelmedi. Tartysty jekpe-jekter nátıjesinde 58 kelide óner kórsetken Erkebulan Ahatov, 72 kelide Aqbota Qydyráli altyn medl aldy. 80 kelide Ulbosyn Adılova myqtylyǵyn dáleldep, altyn medal ıelendi. Kezekti jeńisine qol jetkizgen Ábdisalan Nurmahanov atyndaǵy oblystyq ORMBJSM shákirtin bilikti bapker Móldir Beısembaeva baptaıdy.
Al 71 kelide Nurbek Nurbaev pen 98 kelide Almas Temirbaı kúmiske qol jetkizdi. Sondaı-aq 44 kelide Aqjibek Uzaqbaeva, 54 kelide Gúlnaz Ómirbek, 72 kelide Adına Abaqova, 98 kelide Nurhan Jamalhan qolaǵa qol jetkizdi.
3 kúnge sozylǵan dúbirli dodada Qazaqstan quramasynyń jas samboshylary 32 altyn, 23 kúmis jáne 42 qola júldemen jalpykomandalyq esepte birinshi orynǵa ıe boldy. Osyndaı alamanda Oblys mereıin asyrǵan samboshylardy tájirıbeli jattyqtyrýshylar Ábdisadyq Halılaev, Qanat Arǵynbaevtar jan-jaqty daıyndap baryp, joǵary dárejede óner kórsetti.
Qosa keteıik, sambo kúresiniń sport sheberleri men qurmetti ardagerleriniń arasynda da tartysqa toly jekpe-jekter ótti. Óz jas jáne óz salmaq dárejesine qaraı Túrkistan qalasynan M-1 saıysynda Nyshanbaı Qudaıbergenov (Túrkistan qalalyq № 1 balalar men jasóspirimder sport mektebiniń dırektory) birinshi oryn ıelense, M-4 dárejesinde Túrkistan qalalyq máslıhatynyń tóraǵasy Ǵappar Sársenbaev birinshi oryndy qanjyǵasyna baılady. Sondaı-aq Qoja Ahmet Iasaýı atyndaǵy HQTÝ-dyń professory, sambo kúresinen álemniń 5 dúrkin chempıony Ábdisadyq Halılaev M-7 dárejesi boıynsha birinshi oryndy ıelendi.
Túrkistan oblysy ákiminiń baspasóz qyzmeti
