Astana qalasy ákimdiginiń Mýzykalyq jas kórermen teatry óziniń V maýsymyn 5 qyrkúıek kúni saǵat 19:00-de avtory Muhtar Áýezovtiń «Abaı-Toǵjan» (ınsenırovka avtory Mıras Ábil) mýzykalyq dramasymen ashady.
Qoıylym rejısseri - teatrdyń dırektory ári kórkemdik jetekshisi, Qazaqstannyń eńbek sińirgen qaıratkeri- Ashat Maemırov.
«Abaı-Toǵjan» mýzykalyq dramasy búginge deıingi uly aqyn jaıly qoıylǵan shyǵarmalardan bolmysy bólek, beınesi erek jańa týyndy. Balalar men jasóspirimderdiń dúnıetanymyna, talǵamyna, rýhanı bolmysynyń qalyptasýyna áser etetin bul qoıylym - Abaı ǵumyrynyń bozbala kezeńinen kórinis beredi.
Jas Abaıdyń júreginde oıanǵan alǵashqy mahabbaty, kókireginde týǵan tuńǵysh jyry áýezdi ánge aınalyp, ishki sezim tebirenisterin alasapyran kúıge salady. Toǵjanǵa degen ińkár sezim – ómirge degen qushtarlyqqa ulasyp, Abaıdyń adamzatqa degen asqaq mahabbatynyń temirqazyǵyna aınaldy. Qunanbaıdaı ákeniń ónegesi, Uljandaı ananyń tárbıesi, qorshaǵan ortanyń tylsym syry, ǵashyqtyqtyń ǵalamaty, dos pen baýyrdyń qadiri jas kórermenniń janyna rýhanı lázzat syılap, sanasyna kórkem kózqaras qalyptastyrýǵa yqpal etedi. Abaı poezııasyndaǵy oıly jyrlar men esti ánder oryndalatyn qoıylymda ulttymyzdyń qundylyqtary sahna bıigine kóteriledi. Halyqtyq sana, ulttyq tárbıe, babalar dástúri, uly dala ulaǵaty -ǵashyq Abaıdyń jan súzgisinen ótip, jas sýretkerdi «Súıesiń júrek, kúıesiń» degen uǵymdaryna qaraı jeteleı beredi. Jas Abaıdyń álemi – kórermenge «Ǵashyqtyń tili – tilsiz til» ekendigin uqtyrady.
Sonymen qatar, jańa maýsymda da teatr ujymy súıikti kórermenderine daıyndaǵan tyń týyndylary da jeterlik. Teatr ujymy óz kórermenimen saǵyna qaýyshatyndyǵyn qýana habarlaımyz!
«Abaı-Toǵjan» mýzykalyq dramasynda sýretteletin qazaq eliniń uly oıshyly, aqyn Abaı Qunanbaıulynyń bozań qyrda ótken balalyq shaǵymen kirshiksiz mahabbaty, sezimge toly óleń jyrlary kórermendi beı-jaı qaldyrmaıtyny anyq.
Qoıylym rejısseri- teatrdyń dırektory ári kórkemdik jetekshisi, Qazaqstannyń eńbek sińirgen qaıratkeri- Ashat Maemırov.
Insenırovka avtory - Mıras Ábil.
Mýzykalyq keńesshi - Dımash Qudaıbergen (Qazaqstannyń eńbek sińirgen qaıratkeri).
Qoıýshy sýretshi - Alma Syrbaeva.
Kompozıtor - Baýyrjan Aqtaev.
Baletmeıstr - Shyryn Mustafına
Hormeıstr - Ǵalymjan Berekeshev
