Almaty men Atyraý qalalaryndaǵy beınebaqylaý kameralaryna ózgeris engizildi. Bas prokýratýra elimizdiń barlyq qalasynda bet-álpetin taný úshin jasandy ıntellekt qosylatynyn málimdedi, - dep habarlaıdy "Adyrna" ulttyq portaly.
Bet-álpetin taný júıesin engizý týraly Qazaqstannyń Bas prokýrory Berik Asylov H áleýmettik jelisindegi paraqshasynda habarlady.
Berik Asylovtyń aıtýynsha, Bas prokýratýra sot tóreliginen jasyrynǵan adamdardy izdestirý barysyna qadaǵalaýdy kúsheıtken.
Bıyl beınebaqylaý kameralaryna ózderi monıtorıng jasaý arqyly 53 qashqyndy tanyp, ustaý sharalaryn qabyldaǵan. Al kameralardaǵy jasandy ıntellekt júıesi ázirge eki qalada iske qosylǵan.
"Bıyl tamyzdan bastap Almaty men Atyraý qalalaryndaǵy beınebaqylaý kameralaryna biz qashqyn qylmyskerlerdi, boryshkerlerdi jáne habar-osharsyz ketkenderdi avtomatty túrde taný boıynsha AI elementterimen IT-ázirleýdi qostyq. Eki kún ishinde tergeýden jasyrynǵan 2 adam jáne habar-osharsyz ketken 2 adam tanyldy", - dedi Berik Asylov.
Bas prokýror JI kameralarynyń kómegimen jas pen syrt kelbettiń ózgerýine qaramastan adamdardy taýyp, izdeý sharalaryn kúsheıtýge bolatynyn jetkizdi.
"Prokýrorlarǵa júıeni barlyq óńirlerge engizý tapsyryldy. Qazir 9 myńnan astam adam izdestirilip jatyr, onyń 2,2 myńy qylmysker jáne 2 myńy habarsyz joǵalǵandar".
