Almatyda dástúrli sadaq atýdan ulttyq quramanyń kóshpeli oqý-jattyǵý jıyny ótip jatyr. Ulttyq qurama qyrkúıekte Astanada ótetin V Dúnıejúzilik kóshpendiler oıyndaryna qatysady.
Oqý-jattyǵý jıynyna 12 sportshy qatysady: irikteýden ótken 10 sportshy jáne taǵy 2 sportshy rezervte bolady. Onyń ishinde 6 er adam, 4 qyz kóshpendiler oıyndarynyń erejelerine sáıkes jarystarǵa qatyspaq.
«Jattyǵýlar óte qarqyndy júrip jatyr, V Dúnıejúzilik kóshpendiler oıyndaryna az qaldy. Sondyqtan biz qazir jattyǵýdy kúsheıtip, jańa ádisterdi úırenip jatyrmyz. Sportshylarymyz halyqaralyq deńgeıde jaqsy nátıje kórsetip keledi. Búginde sporttyń osy túri boıynsha Kóshpendiler oıyndaryna qatysýǵa 35 el tirkelgen, bul degen 300-ge jýyq sportshy. Barlyǵy bizdiń sportshylarmen bir arenaǵa shyǵyp, birinshi orynǵa talasady. Osyndaı daıyndyq arqyly biz jaqsy nátıjelerge qol jetkize alamyz jáne sportshylarymyz tuǵyrda kók týymyzdy mindetti túrde kóteredi», - dedi dástúrli sadaq atýdan Qazaqstan ulttyq quramasynyń aǵa jattyqtyrýshysy Dıas Ahmetov.
Daıyndyq barysy týraly dástúrli sadaq atýdan ulttyq qurama múshesi Erbol Tapenov aıtyp berdi.
«Men 5 jyldan astam ýaqyttan beri dástúrli sadaq atýmen aınalysyp kelemin. Bul erekshe sport, óıtkeni ol zeıindi, shydamdylyqty, tózimdilikti qajet etedi. Qazir V Dúnıejúzilik kóshpendiler oıyndaryna daıyndyqtan ótip jatyrmyz, irikteýden óttik, oıynǵa qatysýshylar quramyna kirdik. Ózimizdi joǵary deńgeıde kórsetemiz dep oılaımyn», - dedi sportshy.
Esterińizge sala keteıik, respýblıkalyq sadaq atý federaııasy Ulttyq sport túrleri qaýymdastyǵynyń quramyna kiredi. Sonymen qatar qaýymdastyq quramyna báıge, kókpar, aýdaryspaq, asyq atý, jamby atý, teńge ilý, qusbegilik, JORYQ federaııalary da kiredi. Al qaýymdastyqty belgili kásipker, meenat, Altyn Qyran Foundation qoǵamdyq qory qamqorshylyq keńesiniń tóraǵasy Islambek Saljanov basqarady.
