Sońǵy kezderi qoǵamdaǵy eń mańyzdy jańalyqtyń biri talgoda zorlanǵan áıel taǵdyry. Birden iske kósheıik. Oqıǵa qalaı bolyp edi ózi? Japa shegýshi jalǵyzdan jalǵyz jolaýshylar vagonyndaǵy jeke bólmede otyrady. Sol sátte kókten túskendeı belgisiz azamat kelip, áıeldi jynystyq qatynasqa ıtermeleıdi, durysy kádimgideı qoǵamdyq orynda zorlaıdy. Oǵan áıel eshkimdi kómekke shaqyrmaıdy, aıqaıǵa baspaıdy. Aıqaılaı salsa, poıyzdaǵy júzdegen adamnyń biri jetip keler edi. Soǵan qaraǵanda qarsylyq kórsetpedi me dep te oılap qalasyn. Já, bul jáı ǵana oı ǵoı. Eń soraqysy, birinshisinen keıin ekinshisi iske kóshedi. Túsingen janǵa bul Teńizdegi arab pen qazaq qyzynyń oqıǵasynan da aýyr dúnıe.
Iá, eki birdeı erkektiń astynda qalǵan jolaýshy áıeldiń jaı-kúıi jaqsy bolmaýy kerek. Qudaı betin ary qylsyn árıne, biraq bundaı oqıǵadan keıin ar-uıatyn jalaý etken kez kelgen názik jandy ádette ómirmen birjola qoshtasady. Iakı aýyr kúızelisti bastan keship, esinen adasyp qalady. Nemese "qaısar" áıelderdiń qatarynan bolsa, qasqaıǵan kúıi isti sońyna deıin jetkizip, qos birdeı opasyzdy kem degende 10 jylǵa toǵytýǵa áreket etetin edi. Qarapaıym bazarshy emes, qoǵamnyń zııaly azamatshasy, bildeı bir ǵylym doktory bolǵan soń osy áreketti zorlyq-zombylyq kórgen áıelden el bolyp, jurt bolyp janymyzdy salyp kúttik. Ókinishke oraı, kútken úmitimiz aqtalmady. Qos birdeı jábir kórsetýshi eki jarym-aq jyldy arqalap, taırańdap kete bardy. Al zorlanǵan áıeldiń aýrýhanada eki-aq kún jatyp, qashyp ketkeni taǵy da senimge selkeý túsirdi. Jaraıdy, zorlyq kórgen azamatshaǵa álgiler qomaqty qarajat usyndy, al áıel ony qaltaǵa basyp alyp, úıinde jatyr delik. Biraq ýyz ar, ór namys úshin, búkil qazaq qyzdarynyń úrkek uıaty úshin isti sońyna deıin jetkizip, ekeýine pálen jyl arqalatsa, moraldy shyǵyn dep kópteý aqsha óndirip alýǵa bolatyn edi. Osy jerde jábirlenýshiniń "esepteýishi" durys istemeı qalypty, á?! Jo, joq biz áıeldi kinálaýdan aýlaqpyz. Tek bir mańyzdy dúnıeniń shetin shyǵarǵymyz kelip tur. Osydan úsh aı buryn, búkil poıyz bitken jınalystan kóz ashpaı, ózekti máseleni qaıta-qaıta qozǵap, úlken súzgiden ótkizipti. Jolserikterdi ábden sharshatqan bul jınalys joǵarydaǵy "jynys" máselesine tikeleı qatysty eken. Másele: er adam men áıel adamdardyń poıyzdary bólek bolýy týraly. Osy kúnge deıin "bólek poıyz" máselesi qansha aıtsan da aqylǵa qonymsyz, sanaǵa nanymsyz bolyp kóringen. Estigen adamnyń kúlkisi kelerlikteı edi. Áıtkenmen sońǵy bolǵan "poıyzdaǵy zorlyq" oqıǵasy áıel adamdar men erlerdiń bólek jatqany durys ekenin "ádemi" dáleldep berdi. Osy oraıda oıǵa byltyrǵy mysqylǵa aınalǵan "avtokreslo" máselesi de eriksiz oralady. Ony qaıta qajap qaıtemiz, áıteýir sheshimi balalar avtokreslosy kúrt qymbattap, tapshy zatqa aınalǵanmen aıaqtalǵan. Avtokreslonyń sara jolymen kele jatqan, poıyzdaǵy zorlyq máselesiniń sońy joldyń ý-daı qymbattaýyna apara jatqandaı. Demek poıyzdaǵy zorlyq - poıyz salasyndaǵy bir bıznesmenniń oıdan shyǵarǵan ertegisi ǵana sekildi. Sebebi tirshilik úshin kúrestiń, básekelestiktiń qyzǵan shaǵynda osyndaı qoǵamda shý týǵyzyp, jobandy júzege asyryp turmasan da bolmaıdy. Kútińizder, halaıyq! Taǵy bir qymbatshylyqtyń salqyn lebin sezgeli turmyz.
Aqgúl AIDARBEKOVA
"Adyrna" ulttyq portaly
