Belgili qazaqstandyq kásipker Aıdan Súleımenova Reseı azamattyǵynan bas tartty. Bul týraly 11 shildede «Agentstvo» basylymy jazdy, dep habarlaıdy «Adyrna» tilshisi.
«Keshe prezıdent Vladımır Pýtın
Reseı Federaııasynyń azamattyǵyna qabyldaý jáne odan aıyrý týraly jarlyqqa qol qoıdy. Reseılik tólqujattan bas tartqandardyń qatarynda «AYALA» qaıyrymdylyq qorynyń negizin qalaýshy Aıdan Súleımenova bar. Ol – Qazaqstannyń tuńǵysh Syrtqy ister mınıstri Tóleýtaı Súleımenovtiń qyzy jáne eldegi eń baı ári yqpaldy bıznesmenderdiń biri Danııar Ábilǵazınniń áıeli»,—delingen habarlamada.
Eske salaıyq, buǵan deıin olıgarh Danııar Ábilǵazın men áıeli Aıdan Súleımenovanyń Grekııada ıahta jalǵa alǵanyn belgili bolǵan edi.
21 maýsymda ıahta ekıpajy Gıdra aralyndaǵy órtke baılanysty ustaldy. Belgili bolǵandaı, týrıster jaldamaly ıahtada otshashý atqan. Saldarynan qaraǵaıly orman órtke oranǵan bolatyn. Aral meri Djorgos Kýkýlakı sheteldikterdi sotqa beretinin málimdedi. Kúdiktilerdiń arasynda qazaqstandyq kásipker onyń áıeli de boldy. Alaıda Ábilǵazın málimdeme jasap, órtke qatysy joqtyǵyn aıtty.
Quqyq qorǵaý organdary ormandy órtedi dep aıyptalǵan ıahta kapıtany men onyń kómekshisin ustady. Ekıpajdyń ózge on bir múshesi kepilge bosatyldy. Barlyq kúdikti kináni joqqa shyǵaryp otyr.
