Mäjılısı deputaty, «AMANAT» partiiasy fraksiiasynyŋ müşesı Maksim Rojin Almaty oblysynyŋ Qarasai audanyna qarasty Qaskeleŋ qalasyndaǧy «Jaily mektep» ūlttyq jobasy aiasynda salynyp jatqan 1500 oryndyq mekteptıŋ qūrylysymen tanysty. Oquşy oryndarynyŋ tapşylyǧy mäselesın şeşu – partiianyŋ sailaualdy baǧdarlamasynyŋ basym baǧyttarynyŋ bırı.
Mektep qūrylysynyŋ biudjetı 6,6 mlrd teŋgenı qūrady. Jaŋa oqu oşaǧynda sapaly bılım alu üşın barlyq jaǧdai jasalǧan. Mektepte oqu kabinetterımen qatar, tehnologiialardy öŋdeu şeberhanasy, sport zaly, mäjılıs zaly, ashana, zerthanalyq jäne kompiuterlık synyptar, medisina kabinetı bolady. Merdıger mekemenıŋ ökılı jyl soŋyna deiın qūrylys jūmysynyŋ aiaqtalatynyn aitty.
– «AMANAT» partiiasynyŋ sailaualdy baǧdarlamasy aiasynda öŋırde 26 jaily mekteptıŋ qūrylysy qarqyndy jürude. Būdan basqa biyl taǧy da 27 mekteptıŋ qūrylysyn bastau josparlanǧan. Al Qaskeleŋde salynyp jatqan osy nysannyŋ qūrylys jūmysy qazırgı uaqytta 60 paiyzǧa aiaqtalǧan. Merdıgerler mekteptı uaqytynda bıtıruge tiıs. Ärine, bırınşı kezekte mekteptıŋ qūrylysy joǧarǧy deŋgeide barlyq talaptarǧa sai bolǧany maŋyzdy. «Jaily mektep» jobasy aiasynda salynatyn mektepterdıŋ jihazy tolyqtai otandyq önım boluy qajet, – dedı Maksim Rojin.
Sapar barysynda deputat otandyq önımnıŋ sapasyn baqylau maqsatymen jihaz jasaumen ainalysatyn «Alatau Progress KZ» serıktestıgınde boldy. 100-ge juyq adamdy jūmyspen qamtyǧan «Altamir» öndırıs sehynyŋ jūmysşylarymen kezdestı. Eŋbek ūjymyna zaŋnamadaǧy jaŋaşyldyqtar turaly aityp, partiianyŋ Sailaualdy baǧdarlamasy aiasynda atqarylyp jatqan jūmystardy baiandady.
Jihaz sehynyŋ qūryltaişysy Bauyrjan Moldabaevtyŋ aituynşa, bügıngı taŋda osy zauytta öndırıletın mektep jihazdary tapsyrys beruşıler tarapynan jaqsy baǧa alyp, oǧan degen sūranys arta tüsude. 2023 jyldyŋ qorytyndysy boiynşa öndırıs kölemı 2 milliard teŋgenı qūraǧan.
– Zamanaui jihaz da barlyq qauıpsızdık talaptaryna säikes boluy şart. Soŋǧy kezde otandyq önım ülesınıŋ artyp kele jatqanyn erekşe atap ötuge bolady. Degenmen, jeŋıl önerkäsıpte importtyŋ basym ekenın eskersek, otandyq ülestı arttyru jäne daiyn önımdı satu aumaǧyn keŋeitu jūmystaryn jalǧastyru kerek. Bız öz tarapymyzdan kömektesuge daiynbyz, – dedı Mäjılıs deputaty.
Qazırgı taŋda Eŋbekşıqazaq, Qarasai, Jambyl, Ile, Talǧar audandarynda 39 üş auysymda jūmys ısteidı. 26 myŋnan astam oquşyǧa oryn jetıspeidı. Osy mäselenı şeşu üşın «AMANAT» partiiasynyŋ oblystyq 2023-2027 jyldarǧa arnalǧan sailaualdy baǧdarlamasy aiasynda «Jaily mektep» jobasymen 53 mekteptıŋ qūrylysy josparlanǧan.
