Batys Qazaqstan oblysynyń ákimi Narıman Tóreǵalıev Prezıdenttiń Jarlyǵyna sáıkes sý tasqyny kezinde qyzmettik jáne azamattyq boryshyn atqarýdaǵy janqııarlyǵy, sondaı-aq tótenshe jaǵdaıda kórsetken erligi úshin birqatar azamattardy memlekettik nagradalarmen marapattady.
Oblys ákimi barsha Batys qazaqstandyqtarǵa sý tasqyny kezinde kómek qolyn sozǵandary úshin alǵysyn bildirdi.
«Memleket basshysy Qasym-Jomart Toqaev kúni keshe sý tasqynymen kúresýge qol ushyn sozǵan azamattardyń eńbegin joǵary deńgeıde atap ótken bolatyn. Tasqynǵa tótep berý jumystary barsha óńir halqynyń birliginiń arqasynda júzege asty. Synı saǵatta uıymshyldyq tanytyp, týǵan ólkemizdi aman alyp qalý sharalaryna belsendi qatysqandaryńyz úshin shynaıy rızashylyǵymdy bildiremin», - dedi Narıman Tóreǵalıev.
«Batys Qazaqstan AEJK» JShS elektr monteri Janbolat Ómirzaqov pen «Jaıyqjylýqýat» AQ ekskavator mashınısi Qumarǵalı Saparov III dárejeli «Eńbek dańqy» ordenimen marapattaldy. Al «SAPA90» JShS dırektory Jasulan Eshmuhambetov, Báıterek aýdany Ianvarev orman jáne janýarlar dúnıesin qorǵaý mekemesiniń orman ınspektory Damır Qurmanov jáne «Batys Qazaqstan Saýda» JShS tehnıkalyq dırektory Ahmet Italıev «Eren eńbegi úshin» medaldaryna ıe boldy.
Jalpy Batys Qazaqstandyq 10 azamat Prezıdenttiń Jarlyǵymen joǵary nagradalarǵa ıe boldy. 19 maýsym kúni Astana qalasynda Memleket basshysynyń qatysýymen ótken sharada Qaratóbe aýdany «Nurqanat» ShQ jetekshisi Sarıev Qalımurat Serikbaıulyna – «Qurmet ordeni», Syrym aýdany «Syrym» MKK mehanızatory Baqtyǵalıev Azamat Talǵatulyna –, Terekti aýdany «Avangard» JShS ekskovatorshysy Sapıev Qaırat Hamıdollaulyna – III dárejeli «Eńbek dańqy» ordeni, Oral qalasy «№3 Oblystyq balalar-jasóspirimder sport mektebi» MKQK jattyqtyrýshysy Moldashev Erlan Ermekulyna – «Eren eńbegi úshin» medali, Báıterek aýdany «Ianvarev aýyldyq okrýgi ákiminiń apparaty» MM kúzetshisi– Ysqaqov Rýslan Jaqsyǵalıulyna– «Eren eńbegi úshin» medali tabystalǵan bolatyn.
