Erlan Qarin: Mūrat Äuezov oiy ozyq, ūstanymy berık tūlǧa edı

QR Memlekettık keŋesşısı Erlan Qarin memleket qairatkerı Mūrat Äuezov turaly estelıgın jariialady, dep habarlaidy “Adyrna” ūlttyq portaly. Facebook platformasyndaǧy jazbasynda ol Mūrat Äuezovtyŋ bolmysyn sipattap, el üşın etken eŋbegı turaly baiandady: “Mūrat Äuezov – parasat-paiymy joǧary, bılımı tereŋ, oiy ozyq, ūstanymy berık tūlǧa edı. Bır boiyna san türlı qasiet qonǧan, bır özı bırneşe baǧytta eŋbektengen ämbebap azamat bolatyn. Mädeniettanuşy, şyǧystanuşy, diplomat, jazuşy, qabyrǧaly qairatker retınde ūlt ruhaniiatyn baiytuǧa, ädebi-mädeni ömırdıŋ örkendeuıne, qoǧamdyq-saiasi üderısterdıŋ alǧa basuyna eleulı üles qosty. Būdan bölek ardaqty äke, ūly tūlǧanyŋ laiyqty perzentı boldy. Asqartau äkenıŋ atyn öz biıgınde jalǧastyrdy. Asyldyŋ synyǧy, altynnyŋ qiyǧy, jaqsynyŋ jalǧasy ǧana bolyp qoiǧan joq, özınıŋ soqpaǧyn qalyptastyryp, Äuezov degen abyroily tektı tūǧyrynan tüsırmedı. Bız Mūrat aǧany jas kezımızden tanityn edık. Almatyda tūrǧanymyzda etene aralasyp, jiı pıkırlesıp jüretınbız. Bırde üş kısı bolyp Qyrǧyzstanǧa saparmen baratyn boldyq. Aramyzda Mūrat Äuezov te bar. Bız bırden ūşaqpen emes, kölıkpen barudy ūsyndyq. Onda da maşinany özım jürgızıp baratynymdy aittyp, «Sızge jürgızuşı bolu bız üşın ülken märtebe ǧoi, aǧa. Şarşaityn eşteŋesı joq» degenımızde, ol kısı jyly jymiyp kelısken bolatyn. Sol saparymyz esten şyqpaidy. Är töbenıŋ tarihyn, är qyrattyŋ oqiǧasyn, är taudyŋ şejıresın aitty desem, ötırık bolmas. Tört kündei uaqyt qasynda jürıp, şamamyz kelgenşe qyzmet qylyp, tälımdı sözın tyŋdap, tärbielı ösietın estıp, köŋılımız şat-şadyman küi keşıp edı. Sol kezde Mūrat aǧanyŋ boiyndaǧy ziialylyq pen biiazylyqtyŋ belgısın anyq tanydyq. Şetsız bılımınıŋ bır bölıgın kördık. Odan keiın de qoǧamdyq-saiasi jūmystar barysynda körısıp, oraiy kelgende jolyǧyp otyrdyq. 2022 jyly Prezident Semeige jūmys saparymen baryp, Mūhtar Äuezov pen Qaiym Mūhamedhanovqa, iaǧni ūstaz ben şäkırtke eskertkış aşty. Sol ıs-şaraǧa Mūrat aǧa da qatysyp, Memleket basşysy ekeuı suretke tüstı. Osy surettı körgende erekşe quanǧanymyzdy jasyrǧym kelmeidı. Eldık ıste qairatkerlerdıŋ bır sapta qatar tūrǧany qaşan da jarasymdy ǧoi. Onan soŋ keiın Qasym-Jomart Kemelūly Mūrat Äuezovtı Aqordaǧa şaqyryp, arnaiy memlekettık nagrada tapsyrdy. Būl da taǧylymdy şara edı. Mūrat Äuezov ömırden ötıptı degen aqparatty oqyǧanda oiymyzǧa onyŋ osyndai bolmysy oraldy” dep jazdy ol.