Astana qalasynyń ákimi Jeńis Qasymbek Instagram paraqshasynda erekshe qajettiligi bar balalarǵa qandaı qoldaý kórsetiletinin málim etti. Bul týraly elorda ákimdiginiń resmı saıty jarııalady, dep habarlaıdy “Adyrna” ulttyq portaly.
«Erekshe balalarmen jáne olardyń ata-analarymen kezdestim. Túıtkildi máselelerdi, onyń ishinde keńestiń jańa mindetterin birlese talqyladyq. Qoǵamdyq keńes jumys istegen bir jylda «Bolashaq» korporatıvtik qorymen birlesip, balabaqshalarda ınklıýzııany qoldaýǵa arnalǵan 11 kabınet ashtyq, múmkindigi shekteýli balalarmen jumys isteıtin 150-ge jýyq maman oqyttyq. Erekshe bilim berý qajettilikteri bar 100-den astam bala úshin sport túrleri boıynsha sport sekııalary men toptaryna barý sharasy uıymdastyryldy.
Sonymen qatar, áleýmettený jáne odan ári jumysqa ornalasý úshin kolledjderde erekshe bilim berý qajettilikteri bar balalardy kásiptik oqytý pılot retinde iske qosyldy. Búgin qoǵamdyq tamaqtaný jáne servıs kolledji bazasyndaǵy oqý-óndiristik kombınatqa bardyq.
Jobanyń alǵashqy iske qosylýyna 35 jasóspirim qatysady. Olar «Tigin óndirisi jáne kıimdi modeldeý», «Tamaqtandyrýdy uıymdastyrý – Aspaz», «Tamaqtandyrýdy uıymdastyrý – Kondıter» jáne «Sándik-qoldanbaly óner» baǵyttary boıynsha bilim alady. Oqytý qoǵamdyq tamaqtandyrý jáne servıs kolledji men bıznes, menedjment jáne bilim berý kolledji bazalarynda ótedi. Kýrstardyń uzaqtyǵy – 4 aı. Oqý aıaqtalǵannan keıin kýrsty bitirgeni týraly memlekettik úlgidegi kýálik beriledi.
Sol sııaqty bıyl balabaqshalarda ınklıýzııany qoldaýǵa arnalǵan 20-dan astam kabınet ashýdy, qoǵamdyq tamaqtandyrý jáne qyzmet kórsetý kolledjiniń janynan erekshe bilim berý qajettilikteri bar balalarǵa arnalǵan «Kondıter» jáne «Tiginshi» arnaıy toptaryn iske qosýdy josparlap otyrmyz», – dep jazdy Jeńis Qasymbek.
