12 mausym künı Astanada Qūrban ait merekesıne bailanysty ötken baspasöz mäslihatynda Bas müfti Nauryzbai qajy Taǧanūly käsıpkerlerge ündeu jasady, dep habarlaidy «Adyrna» tılşısı.
«Bız qaşan da özgelerge qaiyrymdylyq jasap, ainalamyzǧa şuaǧymyzdy tögıp, ülkenderdıŋ alǧysy men batasyn alyp, ösıp-öngen elmız. Halqymyzda «Qaiyrymdylyq jasasaŋ – qaiyryn özıŋ köresıŋ» degen naqyl söz bar. Osy rette elımızdegı barşa käsıpker azamattardy Qūrban aittyŋ qūrmetıne mal qūnyn qoldan kötermei, halyqtyŋ äleumettık jaǧdaiyn eskerıp, oŋtaily baǧa ūsynuǧa, jūrtymyz künde tūtynatyn azyq-tülıkke mümkındıgınşe jeŋıldık jasauǧa şaqyramyn»,—dedı ol.
Aita keteiık, būǧan deiın Qazaqstan mūsylmandary dıni basqarmasy biyl Qūrban ait merekesınıŋ bırınşı künı 16 mausymǧa säikes keletının mälımdegen edı.
