Áskerde eki jyl buryn qaza tapqan merzimdi sarbazdyń denesine pyshaq jaraqaty men soqqylardyń izi anyqtaldy, dep habarlaıdy "Adyrna" ulttyq portaly.
Almas Shahımovtyń týystary marqumnyń denesine eksgýmaııa jasatyp, qorytyndysyn alty aı kútken. Saraptama nátıjesinde sarbazdyń denesinen pyshaq jaraqaty men túrli aıaýsyz soqqylardyń izi anyqtaldy.
Shahımov Almaty qalasynda áskerı boryshyn óteýge ketken. Alaıda araǵa eki aı salyp sarbazdyń otbasyna qaraly habar kelgen. Eki jyl buryn ólimniń resmı sebebin jazataıym oqıǵa dep habarlaǵan. Resmı derekterde sarbaz oqý jattyǵý kezinde ózgelerge qaýipsiz jerge barýǵa kómektesip, ózi qatty daýyldyń áserinen qulaǵan metal jabdyqtyń astynda qalyp, mert boldy delingen. Marqumnyń anasy áskerılerdiń aıǵaqtardy joıyp jibergenin aıtady.
“Alǵashynda bizde kóptegen aıǵaq dálelder bolǵandyqtan eksgýmaııa jasatýǵa qarsy boldyq. Alaıda áskerıler keıin barlyq aıǵaqtardy, ulymnyń áskerı kıimderin, polıgondaǵy beınejazbalardyń bárin joıdy.
Máıit saraptamasynan oń jaǵynan úsh pyshaq jaraqaty, qylqyndyrǵan izder, 26 dene jaraqaty anyqtalǵan. Onyń búıregin ezip, bas súıegin syndyryp, temekini arqasyna basyp, sóndirgen”, – dep qosty anasy.
Marqum sarbazdyń anasy balasyna áskerılerdiń nesıe rásimdetkenin habarlaǵan.
“Almasty áskerge kózine ota jasalǵan soń birden alyp ketti. Olar dárigerlerdiń otadan soń jarty jyl fızıkalyq kúsh salýǵa bolmaıdy degen tyıymyna qaramady. 27 mamyr ony alyp ketti. Mamyrdyń 28-i kúni ulym Almatyǵa jetti. 29-da áskerı bólimine jetip, 30-da onyń atyna nesıe rásimdelgen”, – dedi anasy.
Ulttyq gvardııa tipti sarbazǵa erligi úshin marapat ta bergen. Marqumnyń jaqyndary bul marapattan bas tartqan. Sebebi olar Almastyń shańdy daýyldan ózgelerdi qutqaryp emes, bireýdiń qolynan mert bolǵanyna senimdi.
Aıta keteıik, 2022 jylǵy 9 tamyzda saǵat 20:55 shamasynda qatty daýyl kóterilip, jel saldarynan sarbazdar ornalasqan shatyr qalashyǵy búline bastaǵan. Qatardaǵy A.N. Shahımov áriptesteriniń qaýipsiz orynǵa shyǵýyna kómektesip júrip shatyrdan sońǵy bolyp shyqqan kezde, shatyrdyń temir jaqtaýy basyna tıip jaraqat alǵan dep habarlanǵan bolatyn.
