Quldyq sana nemese qala kúni

2677
Adyrna.kz Telegram

Bıyl Pavlodarda Qala kúni merekesin toılaý shildeniń 17-sinde bastalyp ketti! Kún saıyn qalanyń shaǵyn aýdandarynda, aýyldyq aımaqtarynda mádenı, sporttyq sharalar men saýda-sattyq jármeńkeleri uıymdastyryldy. Merekeniń sharyqtaý shegi 20 shildege dóp keldi. Ertis jaǵalaýyndaǵy is-sharalar baǵdarlamasynda tıisti azamattarǵa «Oblysqa sińirgen eńbegi úshin» tós belgileri, «Pavlodar qalasynyń qurmetti azamaty» ataǵy, alǵys hattar tabys etildi, toıshyl qaýymdy Reseıdiń Omby, Novosıbırsk qalalarynan kelgen delegaııa ókilderi quttyqtady, kórmeler, sporttyq sharalar ótkizildi, tipti hot-dog jeýden de jarys uıymdastyryldy! Sondaı-aq, Ertis ózeninde kemeler kerýeni júzip ótti, qazaqstandyq, sheteldik estrada juldyzdary óner kórsetip, sońy lazerlik shoýǵa ulasty! Asta-tók toıǵa on myńdaǵan adam jınalyp tamashalady!


Pavlodarda munshalyq sán-saltanatpen tipti memlekettik merekeler de toılanǵan joq! Qala kúnin uıymdastyrýǵa jumsalǵan qarjy mólsheri júz mıllıondaǵan teńgemen esepteletini anyq. Al qazirgi áleýmettik-ekonomıkalyq kúrdeli kezeńde áleýmettik az qamtamasyz etilgen otbasylar men azamattardyń qanshasy jergilikti bıliktiń qarjylyq-materıaldyq qoldaýyna muqtaj?.. Qala turǵyndarynyń qanshasy baspanaǵa, dári-dármekterge qoldary jetpeı júr?..
Aıtpaqshy, Elbasy N.Á. Nazarbaevtyń «Rýhanı jańǵyrý» baǵdarlamasyna sáıkes jyl saıyn oblys ortalyǵynda ótkiziletin «Uly Dala» festıvalin bıyl oblys ákimdigi qarjy únemdeý maqsatynda Baıanaýyl aýdanynda jergilikti tulǵalardyń mereıtoılarymen biriktirip ótkizýdi josparlapty degen sybys estidik...
Sonymen, Pavlodardaǵy Qala kúni merekesi bıyl nelikten burynǵy jyldarǵa qaraǵanda aıryqsha toılandy?.. Meniń paıymdaýymsha, jergilikti patshashyl-keńesshil toptar kelesi jyly Pavlodar qalasynyń negizin patsha áskerleriniń bekinis retinde qalaǵanyna 300 jyl tolýyn dúrkiretip toılaý maqsatyn qazirden bastap júzege asyra bastaǵan sııaqty. Shamasy, sol toptardyń bedeldi ókilderi bizdiń ákim-qaralarǵa sózderin ótkizgen-aý. Qala kúni týraly aqparatty oblys ákimdigine qarasty pavlodarnews.kz portaly «Pavlodar qalasynyń 299 jyldyǵyn atap ótýge jaǵalaýǵa 30 myńǵa jýyq adam jınaldy» dep aıqaılatyp turyp habar taratty (http://pavlodarnews.kz/index.php?id=25950)! Bul toıdyń ózge toılardan ózgesheleý ekenin osydan ańǵaryńyz!
«Qýyrdaqtyń kókesin túıe soıǵanda kóresiń» degendeı, merekeniń kókesin kelesi jyly kóretin tárizdimiz! Ertistiń Kereký óńirin patsha áskerleriniń jaýlap alyp, Korıakov Iar bekinisin salǵanyna 2020 jyly 300 jyl tolady. Bıylǵy mereke sol sharanyń daıyndyǵy ispettes bolyp tur.
Áýelde jergilikti patshashyl-keńesshil toptar qazirgi Pavlodar qalasynyń ornynda áskerı bekinistiń irgetasy qalanǵanyna 270 jyl tolýyn 1990 jyly atap ótýge daıyndaldy! Olar tipti Omby qalasynan kazaktardyń áskerı formalaryn aldyrtyp, zeńbirekterdiń maketin jasap, ortalyq kóshede patsha áskerleri paradynyń teatrlanǵan kórinisin qoıýdy oılastyrǵan edi! Biraq Qamataı Battalov bastaǵan bir top soǵys jáne eńbek ardageri qalalyq partııa komıtetine baryp, «Eger qazaq jerin patsha áskerleriniń jaýlaǵanyn toılaıtyn bolsańdar, biz narazylyq mıtıngisine shyǵamyz!» degen talap qoıdy. Abyroı bolǵanda, jergilikti bılik bul máseleniń durys sheshimin taýyp, tek qala kúnin ótkizdi.
Álgi toptar sonda da bastapqy maqsatynan taımaı, «Novoe vremıa» sııaqty orystildi táýelsiz basylymdar arqyly oqtyn-oqtyn ákimdikterge sózderin ótkizýge árekettendi! Sóıtip, árbir bes jyl saıyn qalanyń 275, 280, 285, 290, 295 jyldyqtaryn merekeleý jóninde talap-tilekterin jarııa etip otyrdy! Áıtse de, BUU-nyń ımperııalardyń basqynshylyq joryqtaryn dáripteýge tyıym salǵan qaýlysyn qurmetteıtin sol kezdegi oblys, qala basshylary álgilerdiń áreketterin elemeı, memleketshil ǵalymdardyń, shyǵarmashyl zııalylardyń, qoǵam qaıratkerleriniń oryndy ýájderine qulaq asty!
Óz basym Pavlodardyń 300 jyldyǵyn merekeleý isi qolǵa alynatynyn sonaý 2016 jyly boljap, jergilikti bılikti oılanyp tıisti sheshimder qabyldaýǵa shaqyrǵan edim (http://ult.kz/post/bukhgoltstyn-zholdarymen-ekspeditsiyasynyn-kozdegeni-ne-).
Ol kezde de oblys ákimi osy Bolat Baqaýov bolatyn, biraq qalabasy Qaırat Núkenov emes, basqa bireý edi. Sonda da esim-soılary atalǵan eki basshyǵa ótken jyly Semeıdiń ákimi Ermak Sálimovtyń qalanyń áskerı bekinis retinde salynǵanyna 300 jyl tolýyn merekeleýden bas tartyp, tek Qala kúnin ótkizgen ónegeli isin aıtsam deımin.
Bizdegi máseleni zańdyq, moroldyq, etıkalyq turǵydan qarastyrǵanda, Egemen eldiń bildeı bir oblysy men qalasyn basqaryp otyrǵan memlekettik qyzmetshiler ǵana emes, qatardaǵy qarapaıym azamattar da óz jerlerin ózge memlekettiń jaýlap alyp, bekinis salǵan kúnin mereke retinde toılaýǵa tıisti emes qoı... Álde patshazadanyń atyna qoıylǵan Pavlodar ataýy ózgertilmeıinshe bul túıin túbegeıli sheshilmeı me?..

Arman QANI,
Pavlodar qalasy.

"Adyrna" ulttyq portaly

Pikirler