Prezıdenttiń «Taza Qazaqstan» jalpyulttyq bastamasy aıasynda «AMANAT» partııasy ár apta saıyn uıymdastyrylatyn «Taza beısenbi» ekologııalyq akııasyn bastady. Búgin partııanyń 12 myń múshesi men «Jastar Rýhy» jastar qanatynyń belsendileri respýblıka boıynsha aýmaqtardy tazalaýǵa shyqty.
«AMANAT» partııasynyń músheleri ózen jaǵalaýlary, orman alqaptary, óndiristik aımaqtar jáne jol boıyndaǵy aýmaqtardy qamtıtyn 475 ýchaskeni aıqyndady. Bir kúnde akııaǵa 12 myń adam qatysty. Atap aıtqanda, Astanada partııa músheleri zańsyz qoqys alańyna aınalǵan qaraýsyz ýchaskeni retke keltirdi.
«AMANAT» partııasynyń Atqarýshy hatshysy Daýlet Káribek «Taza beısenbi» partııalyq jobasy jańa ekologııalyq mádenıet pen azamattardyń qorshaǵan ortaǵa degen sanaly kózqarasyn qalyptastyrýdy kózdeıtinin atap ótti.
«Memleket basshysy Qasym-Jomart Toqaev «Taza Qazaqstan» jalpyulttyq naýqanyn bastaı otyryp, bul bir rettik akııa emes ekenin erekshe atap ótti, árbir úı, aýla, turǵyn úı kesheni, saıabaq jáne basqa da nysandar nazardan tys qalmaýǵa tıis. «AMANAT» partııasynyń músheleri atalǵan naýqanǵa alǵashqy kúnnen-aq belsendi qatysýda. «Jastar Rýhy» jastar qanatynyń shamamen 4 myńǵa jýyq volonteri sý tasqynynan zardap shekken jandardyń baspanasyn retke keltirýge kómektesti. Endi ár apta saıyn el aýmaǵynda túrli ýchaskelerde qoqys jınaý jumysyn uıymdastyramyz. Osy maqsatta lastanǵan aýmaqtardyń Kartasy ázirlendi. El azamattary, óskeleń urpaq tabıǵı ónim tutynyp, taza aýamen demalyp, sapaly sý ishkenin qalasaq, ekologııalyq sana men mádenıetti qazirden qalyptastyrýymyz kerek. Ony eń aldymen ózimizden bastaǵan jón. Sondyqtan, qorshaǵan ortaǵa beı-jaı qaramaıtyn barsha qazaqstandyqty «Taza beısenbi» akııasyna qosylýǵa shaqyramyz», – dedi ol.
Aldyn ala eldi mekenderdegi lastanǵan aýmaqtardyń kartasy ázirlendi. Sonyń negizinde el aýmaǵynda jol boıyndaǵy aýmaqtardan, ónerkásiptik aımaqtardan, turǵyn aýdandardan, áleýmettik nysandardan jáne basqa da kóptegen aýmaqtardan 475 ýchaske anyqtaldy. Partııalyqtar ár beısenbi saıyn osyndaı tazalyq jumysyn júrgizýdi josparlap otyr. Is-shara tek qoqys jınaýmen shektelmeıdi. Ár ýchaskege máslıhat depýtattary, belsendiler jáne bastaýysh partııa uıymdarynyń basshylary bekitiledi. Olar sol ýchaskede turaqty túrde tártip pen tazalyqty qamtamasyz etýmen qatar, qoqys jáshikterin ornatý, aýmaqtardy kógaldandyrý, joldar men jaıaý júrginshiler jolyn jóndeý sııaqty abattandyrý jáne ınfraqurylymdy damytý máselelerin sheshedi.
«Taza memleket – bul tek únemi tazalanatyn emes, qoqys tastalmaıtyn el degen sóz. Biz tazalamasaq, kim tazalaıdy? Qazir tazalamasaq qashan tazalaımyz? Bul meniń elim, bul meniń qalam. Men balalarym men nemerelerimniń taza qorshaǵan ortada ósip, taza aýamen dem alyp, taza sý ishkenin qalaımyn», – dedi elordalyq bastaýysh partııa uıymynyń belsendisi Dınara Maratqyzy.
Jalpy «Taza Qazaqstan» jalpyulttyq akııasy aıasynda «AMANAT» partııasy 5 baǵyt boıynsha jumys bastady:
1. ekologııa salasyna qatysty zań shyǵarý;
2. óńirlerde lastanǵan aýmaqtardyń kartasyn jasaı otyryp, «Taza beısenbi» ekologııalyq akııasyn uıymdastyrý;
3. «Astana-Almaty» tas jol boıyndaǵy aýmaqty tazartýǵa arnalǵan «Taza Qazaqstan» road-estafetasy;
4. tarıhı, mádenı jáne tabıǵı murany vandalızm áreketinen qorǵaýǵa arnalǵan qoǵamdyq naýqan;
5. jasyl volonterlik – ekologııalyq volonterler qozǵalysyn qurý.
Eske sala keteıik, sý tasqynynyń qaýipti kezeńi aıaqtalǵannan keıin «AMANAT» partııasynyń 4 myńǵa jýyq belsendisi men «Jastar Rýhy» jastar qanatynyń volonterleri qarǵyn sýdan zardap shekken turǵyndardyń baspanasyn retke keltirýge kómektesti. Elimizdiń barlyq óńirindegi barsha partııalyqtar saıabaqtardy, skverlerdi, aýlalardy tazartyp, tarıhı-mádenı jáne tabıǵı eskertkishterdi tazalaýda. Sondaı-aq senbilikke shyǵyp, aǵash egedi jáne ózge de is-sharalardy uıymdastyrady. Máselen, 27 sáýirde, ıaǵnı nebári bir kúnde el aýmaǵynda partııalyqtar 55 myń túp aǵash ekti.
Sondaı-aq, ekologııalyq máselelerdi sheshý – «AMANAT» partııasynyń saılaýaldy baǵdarlamasynda qamtylǵan mańyzdy basymdyqtyń biri. Saılaýaldy ýádelerdi júıeli júzege asyrý jumysy aıasynda byltyr memlekettik orman qory aýmaǵyna 302,7 mln túp aǵash egildi. Sonymen qatar, 39 iri ónerkásiptik kásiporynda aýany lastaýyn baqylaıtyn avtomattandyrylǵan júıe ornatyldy.
2027 jylǵa qaraı partııanyń saılaýaldy baǵdarlamasy aıasynda turmystyq qatty qaldyqtardy qaıta óńdeý jáne kádege jaratý úlesin 36%-ǵa deıin ulǵaıtý, Jaıyq ózeniniń ekojúıesin qalpyna keltirý, Balqash kóline turaqty sý aǵynyn qamtamasyz etý, aýa sapasynyń ındeksin engizý, lastanǵan eldi mekende kásiporynnyń aýany lastaý normatıvterin 40%-ǵa deıin tómendetý, sondaı-aq jumys istep turǵan 16 sý qoımasyn qaıta jańartý jáne jańadan 14 sý qoımasyn turǵyzý josparlanýda.
