Mıanmada 7,7 magnıtýdaly jer silkinisi boldy. Kúshti jer asty dúmpýleri Taıland pen Qytaıda da sezildi. Bangkokte kópqabatty ǵımarat qulap, 67 adam iz-túzsiz joǵalyp ketken, dep habarlaıdy “Adyrna” ulttyq portaly Euronews saıtyna siltep.
Taıland astanasy Bangkokte Mıanmanyń kórshi aımaǵynda bolǵan 7,7 magnıtýdaly jer silkinisinen keıin kópqabatty turǵyn úılerdiń turǵyndary evakýaııalandy. AQSh geologııalyq qyzmeti men Germanııanyń GFZ geoǵylym ortalyǵy epıentrdiń Mandalaı qalasynan ońtústik-batysqa qaraı ornalasqanyn jáne jer silkinisiniń oshaǵy 10 kılometr tereńdikte bolǵanyn habarlady.
Taıland astanasynda qurylys ústindegi kópqabatty ǵımarat qulap, 67 adam joǵalyp ketkeni aıtyldy. Qala bıligi úsh adam qaza tapqanyn rastady.
Bangkok aýdanynda 17 mıllıonnan astam adam turady, olardyń kópshiligi kópqabatty úılerdi mekendegen. Qaýip-qater sıgnaldary saǵat 13:30-da iske qosylyp, qorqyp qalǵan turǵyndar kópqabatty úıler men qonaqúılerdiń baspaldaqtarymen kóshege shyǵyp, megapolıstiń tyǵyz ornalasqan ortalyǵynda jasyrynyp jatty.
Jer silkinisinen keıin birneshe mınýt ishinde turǵyndar kóshe boıymen júrip, kúnniń aptap ystyǵynan kóleńke izdedi.
Jer silkinisiniń saldarynan kópqabatty ǵımarattardyń shatyrlarynda ornalasqan basseınderden sý kóshege aǵyp ketti.
Azamattyq soǵys júrip jatqan Mıanmada jer silkinisiniń saldarlary týraly ázirge aqparat joq. Aqparat agenttikteri tótenshe jaǵdaı engizilgeni týraly habarlady.
Ekinshi úlken qalasy Mandalaede, epıentrden 33 shaqyrym jerde 1,5 mıllıon adam turady.
