Qoi baǧyp jürgen kezınde äke-şeşesı Äbılhandy üilendırmek bolady. «Balamyzdyŋ ülkenı sen tūrǧanda, ınılerıŋe qalai üilen dep aitamyz? Jönı tüzu bıreudıŋ qyzyn atastyraiyq, üilen balam!» – deidı. Äbılhan: «Qoidy tastap, oqimyn, äiel almaimyn», – dep könbeidı. «Būl oquǧa ketpei tūrǧanda, aiaǧyna matau salaiyq» dep, äke-şeşesı bır sırgelınıŋ qyzyna qūda tüsedı. Qyz da Äbılhandy mensıne qoimai: «Qoişyǧa timeimın, onymen baidyŋ esıgınıŋ aldynda jalşylyqta jüretın jaiym joq», – dep azar da bezer bolady. Äbılhannyŋ da üilenuge qūlqy joq. Bıraq äke-şeşenıŋ sözın attap ketuge batyly jetpei, basy qatyp jürgende, qyz basqa bıreumen qaşyp ketedı.
«Qap, senı me?» – dep qyzǧa qatty küiınbeidı, bıraq namysyna tigen osy oqiǧa Äbılhannyŋ köŋılıne az da bolsa syzat tüsıredı. Dünie alma-kezek degen. Almatyda oquǧa tüsken soŋ galstuk taqqan qalpymen törege ūqsap, qyzdyŋ közıne tüskısı keledı. Äbılhan qasyna kısı ertıp, qatar jatqan auylǧa älgı kelınşektıŋ üiıne barady. Jalşylyqtyŋ jūrnaǧy da qalmaǧan, qalanyŋ adamdaryndai kiıngen Äbılhandy körıp, qyz «kötek» dep qūlap qala jazdap, esın jiyp üiden şyǧa jönelıptı.
(Äbılxan Qasteev atamyzdyŋ ömırınen üzındı.)
Güljan Ahmetjanqyzy, Qarlyǧa İbragimova. («Aq jelken», №1. 2014 jyl)
"Adyrna" ūlttyq portaly
