Tashkent oblysy Almalyq qalasynyń 28 jastaǵy turǵyny Ózbekstan prezıdenti Shavkat Mırzıeevti balaǵattady dep aıyptaldy. Bul týraly Gazeta.uz jazdy, dep habarlaıdy «Adyrna» tilshisi.
Úkimdi 8 sáýirde Samarqand oblysynyń Ystyqhan aýdandyq qylmystyq ister jónindegi soty shyǵardy.
Sottalýshy — farmaevtıkalyq kompanııanyń negizin qalaýshy. Ol 2023 jyldyń 2 mamyry men 31 tamyzy aralyǵynda Instagram jelisinde prezıdentke til tıgizetin pikirler qaldyrǵan. Er adam kinásin tolyq moıyndap, jasaǵan áreketine ókinetinin jetkizdi.
Sot Almalyq turǵynyn Ózbekstan Qylmystyq kodeksiniń 158-babynyń 3-bóligi («Ózbekstan Respýblıkasy prezıdentin jarııa túrde qorlaý nemese jala jabý, sol sııaqty baspasóz nemese ózge de buqaralyq aqparat quraldaryn, telekommýnıkaııa jelilerin nemese ınternetti paıdalaný») boıynsha kináli dep tapty. Ol 2 jyl 6 aı túzeý jumystary túrindegi jazaǵa tartyldy. Sondaı-aq aı saıyn jalaqysynyń 20 paıyzy óndirip alynatyn bolady.
Eske salaıyq, buǵan deıin jyl basynan beri Ózbekstan prezıdentin «balaǵattady» degen 10 adamnyń sottalǵanyn jazǵan edik.