Pekın saıasatyn qoldaıtynyn jetkizgen hat avtorlary Qytaıdyń "adam quqyǵy salasyndaǵy jetistikterin" maqtaǵan.
"Terrorızm jáne ekstremızm sııaqty iri qaýip-qaterge kezikken Qytaı Shyńjańdaǵy terrorızm men radıkalızmmen kúresý úshin birqatar shara qoldandy, kásibı bilim berý jáne oqytý ortalyqtaryn ashty" delingen hatta.
Oǵan 37 eldiń ókili qol qoıǵan. Hatta sonymen birge Shyńjańda barlyq etnıkalyq toptardyń negizgi quqyqtary saqtalatyny, Pekın áreketiniń arqasynda "aımaqtaǵy jaǵdaıdyń qaýipsiz bola bastaǵany", sońǵy úsh jylda munda terrorıstik shabýyl bolmaǵany aıtylady. Hat avtorlary buǵan qosa Shyńjań turǵyndarynyń "baqytty ári tatý-tátti ómir súrip jatqanyn" atap ótken.
Hatqa qol qoıǵan elder arasynda Saýd Arabııasy, Reseı, Soltústik Koreıa, Venesýela, Kýba, Belarýs, Mıanma, Fılıppın, Mıanma, Sırııa, Pákistan, Oman, Kýveıt, Katar, Birikken Arab Ámirlikteri, Bahreın bar.
Pekın aımaqta adam quqyǵy buzylyp jatyr degen derektiń bárin joqqa shyǵarýmen keledi. BUU janyndaǵy Qytaıdyń turaqty ókili Sıýı Chen juma, 12 shildede BUU-nyń Adam quqyǵy boıynsha qorytyndy jıynynda Qytaı bıligi mundaı qoldaýdy "qatty baǵalaıdy" dedi.
Shyńjań aımaǵyndaǵy lagerler jaıly alǵash ret 2017 jyldyń kókteminde aıtyla bastaǵan. BUU Shyńjańdaǵy "saıası tárbıeleý ortalyqtarynda" mıllıonǵa jýyq adam "erkinen tys" qamaýda otyrǵanyn, olardyń arasynda uıǵyrlar men qazaqtar baryn málimdegen.
Qazaqstannyń birneshe qalasynda azamattar jınalyp, "Shyńjańda jaqyndarymyz qysym kórip jatyr, lagerde otyr, Qazaqstanǵa óte almaıdy" degen. Olar Qazaqstan bıliginen, halyqaralyq uıymdardan kómek suraǵan. Qazaqstan syrtqy ister mınıstrligi «Shyńjańdaǵy lagerler Qytaıdyń ishki máselesi, onda qamaýda otyrǵan qazaqtar Qytaı azamaty» degen. Keıin mınıstrlik Pekınmen kelissóz júrgizip, Shyńjańnan bergi betke óte almaı qalǵan qazaqtardyń máselesi sheshilip jatqanyn aıtqan.
Qytaı úkimeti basynda saıası tárbıeleý ortalyqtarynyń baryn joqqa shyǵaryp keldi. Keıin Pekın Shyńjańdaǵy saıasatyn "ekstremızmge qarsy shara" dep atap, adamdar erkinen tys otyrǵan lagerlerdi "til úırenip, kásipke baýlıtyn " ortalyqtar dep túsindirgen edi.
"Azattyq" radıosy
