Bıyl Qazaqstan mektepterinde sońǵy qońyraý saltanaty bolmaıdy. Onyń ornyna barlyq mektepte oqý jylynyń aıaqtalýyna arnalǵan biryńǵaı synyp saǵaty ótedi, dep habarlaıdy “Adyrna” ulttyq portaly Oqý-aǵartý mınıstrliginiń málimdemesine siltep.
Vedomstvo jarııalaǵan málimetke súıensek, 2023-2024 oqý jylyn 3,8 mln-nan astam qazaqstandyq oqýshy aıaqtaıdy, onyń 186 myńy – mektep túlekteri. Bıylǵy oqý jylynyń uzaqtyǵy 34 aptany quraıdy, oqý 25 mamyrda aıaqtalady.
«Sý tasqynynan oryn alǵan jaǵdaıǵa jáne 25 mamyrdyń demalys kúnine sáıkes kelýine baılanysty 24 mamyr kúni barlyq mektepterde sabaqta 2023-2024 oqý jylynyń aıaqtalýyna arnalǵan synyp saǵaty uıymdastyrylady. Onda synyp jetekshileri oqýshylarmen birge ótken oqý jylyn qorytyndylaıdy. Sý tasqyny bolǵan óńirlerdegi sabaq qashyqtyqtan uıymdastyrylǵan balalar úshin synyp saǵattary onlaın formatta bolady» – dep atap ótti Tárbıe jumysy jáne qosymsha bilim berý departamenti dırektorynyń orynbasary Qarlyǵash Qurmanbekova.
11 (12) synyp túlekterine attestat tapsyrý jáne erekshe úlgidegi «Altyn belgimen» marapattaý 19-22 maýsym aralyǵynda mektepterdegi barlyq emtıhandar aıaqtalǵannan keıin ótedi. Budan bólek mınıstrlik ókilderi 9-11-synyp túlekteriniń qaýipsizdigin jáne emtıhandarǵa sapaly daıyndyǵyn qamtamasyz etý maqsatynda aqsha jınaýǵa, saltanatty is-sharalar, banketter uıymdastyrýǵa jáne avtomobıldermen shyǵýǵa tyıym salynatanyn eskertti.
