Búgin Maıqudyq saıabaǵyna 1100 jas aǵash egildi. Demalys ornynda alma, sheten, mamyrgúl, moıyl, qaraǵan, qaraǵaı, terek, usaq japyraqty qaraǵash ósiriledi.
Qoǵamdyq aýmaqty abattandyrýǵa jergilikti turǵyndar, memlekettik qyzmetkerler, shaǵyn jáne orta bıznes ókilderi keldi.
Aǵash egýge Qaraǵandy oblysynyń ákimi Ermaǵanbet Bólekpaev ta qatysty.
– Prezıdenttiń bastamasymen elimizde "Taza Qazaqstan" ekologııalyq akııasy bastaldy. Bul bir kúndik akııa emes, ol uzaq merzimge sozylmaq. Oblysymyzdyń turǵyndary aýmaqtardy tazalaýǵa, kógaldandyrýǵa belsendi qatysyp jatyr. Aımaqta barlyq aýdandar men qalalarda aǵash egý júrip jatyr. Bul jumys áli de jalǵasady. Tek Qaraǵandy boıynsha 90 myńnan astam aǵash egiledi. Kırzavod aýdanynda orman alqabyn qalpyna keltirý josparlanǵan. Belsendilik tanytqandaryńyz úshin barshańyzǵa rahmet! – dep óńir basshysy turǵyndarǵa alǵysyn bildirdi.
Buqara birigip jasalyp jastqan jumysqa Álıhan Bókeıhan aýdany mektepteriniń dırektorlary óz úlesin qosty.
– Kóktemniń bastalýymen bizde qala men oblys boıynsha árdaıym senbilikter ótedi. Iz de ol sharalardan shette qala almaımyz. Búgin biz dırektorlar korpýsymen saıabaqta aǵash egemiz, al ata-analar qaýymy, muǵalimder men oqýshylar mektep aýmaǵyn kógaldandyrýmen aınalysady. Barlyq aǵashtar tamyr jaıyp, qalamyzdyń turǵyndaryn qýantady dep úmittenemiz, – dedi № 85 mektep dırektory Saltanat Tursynova.
Eresektermen birge balalar da aǵash ekti.
– Men bizdiń saıabaqtyń taza, jaqsy jáne ádemi bolǵanyn qalaımyn. Aǵammen birge keldim. Eresekterge kómektestim, kóshetter ekken shuńqyrlarǵa topyraq salyp otyrdym. Ózim bir aǵash ektim. Men saıabaqqa jıi baryp, onyń qalaı ósip jatqanyn kbaqylap otyramyn, – deıdi 7 jasar Arsenıı Obert.
Osy jyldyń kókteminde Álıhan Bókeıhan aýdanyna 10 myńnan astam túrli aǵash egiledi.
Sondaı-aq, búgin Qaraǵandyda áýejaı aýdanynda 1000 pıramıdalyq terek egildi. Bul aǵashtar allergııasy bar adamdar úshin qaýipsiz bolyp sanalady.
Akııaǵa 300-den astam adam – ákimdik ókilderi, depýtattar, ekologııalyq qozǵalys eriktileri, QarÝ stýdentteri, Qaraǵandy akademııasynyń kýrsanttary jáne t. b. qatysty.
Aǵash egý "Taza Qazaqstan" respýblıkalyq ekologııalyq akııasy aıasynda ótti. Bolashaqta kóshetterge kútim jasalady.
