Qarjy monıtorıngi agenttigi Qazaqstannyń úsh óńirinde selden qorǵaıtyn bógetter men sý qoımalaryn salý jáne tıisti jóndeý, ózen arnalaryn keńeıtý jumystaryn júrgizýge tıis merdigerlerge qatysty sotqa deıingi tergeý amaldaryn bastady. Bul týraly vedomstvonyń baspasóz qyzmeti málimdedi, dep habarlaıdy “Adyrna” ulttyq portaly.
Almatyda TJM "Qazseldenqorǵaý" MM-men kelisimshartqa otyrǵan merdiger uıymnyń dırektory bıýdjet qarajatyn jymqyrý deregi boıynsha kúdikke ilindi.
"JShS "Aqsaı ózeniniń basseıninde seldi ustaıtyn bóget salý" jobasyn júzege asyrǵan. JShS-nyń jaýapty tulǵalary aldyn ala sóz baılasý arqyly asa iri kólemde bıýdjet qarajatyn jymqyrdy degen kúdikke ilindi. Zalal somasy aldyn ala esep boıynsha 775 mln teńgeden asady", - dedi QR Qarjylyq monıtorıng agenttiginiń resmı ókili Álibek Ábdilov OKQ alańynda ótken brıfıngte.
Al Aqtóbe oblysynda aýyr zardaptarǵa ákep soqqan mindetterge nemquraıly qaraý faktisi boıynsha "Magadjan" bógetin (sý qoımasyn) senimgerlik basqarýǵa alǵan JShS basshysyna qatysty sotqa deıingi tergeý bastaldy.
"Anyqtalǵandaı, 2014 jyly bul bóget balyq sharýashylyǵyn júrgizý maqsatynda jeke kompanııaǵa senimgerlik basqarýǵa berilgen. Alaıda JShS bógetti kútip ustaý jáne qyzmet kórsetý boıynsha óz mindetterin oryndamaǵan", - dedi spıker.
Sondaı-aq, Ulytaý oblysynda da JShS laýazymdy tulǵalaryna qatysty sotqa deıingi tergep-tekserý bastaldy. Atalǵan JShS kóktemgi sý tasqyny kezinde jaqyn mańdaǵy aýmaqtardy shaıylyp ketýden qorǵaý úshin uzyndyǵy 2 shaqyrym Jezdi ózenine sanaııa júrgizý úshin jalpy somasy 485,5 mln teńgege memlekettik mekememen shart jasasqan.
Alaıda jobany iske asyrýdyń baqylaý ólshemimen merdiger jalpy somasy 282,5 mln teńgege joba boıynsha qurylys-montajdaý jumystaryn naqty oryndamaǵany anyqtaldy. Sol kezde JShS atyna oryndalǵan jumystar aktilerine sáıkes 400 mln teńge aýdarylǵan. Saldarynan 26 úı sý astynda qalyp, 174 adam evakýaııalandy. Sotqa deıingi tergeý amaldary jalǵasýda.
