Eks-prezident Nūrsūltan Nazarbaevtyŋ nemere ınısı Qairat Satybaldyūly memleketke taǧy 50 mlrd teŋge qaitarmaq. Būl turaly Sybailas jemqorlyqqa qarsy ıs-qimyl agenttıgı mälımdedı, dep habarlaidy “Adyrna” ūlttyq portaly.
"11 säuırde Q. Satybaldyūlyna qatysty qylmystyq ıstı qarau şeŋberınde sot (QR QK 218-baby 3-bölıgınıŋ 3-tarmaǧy) prokurordyŋ ötınışı boiynşa zaŋsyz satyp alynǧan aktivterdı qaitaru jönındegı räsımderdı oryndau qajettılıgıne bailanysty prosestık kelısım jasasu üşın qosymşa merzım beru turaly şeşım qabyldady", - delıngen habarlamada.
Atap aitqanda, sottaluşynyŋ jalpy somasy 50 mlrd teŋgeden asatyn qosymşa mülıktık aktivterın memleket paidasyna qaitaru turaly mäsele qaralyp jatyr.
Būǧan deiın habarlanǧandai, tergeu barysynda Q. Satybaldyūly öz kınäsın tolyq moiyndap, qylmystyq jolmen alynǧan mülıktı aşuǧa yqpal etken.
Sotqa deiıngı tergep-tekseru kezeŋınde Sybailas jemqorlyqqa qarsy qyzmet sottaluşynyŋ jäne onymen bailanysty tūlǧalardyŋ jalpy somasy 732 mlrd teŋgeden astam mülıktık aktivterı men aqşalai qarajatyn memleket paidasyna (äkımşılık ǧimarattar, ekskliuzivtı zergerlık būiymdar, liuks üiler, päterler men avtokölıkter, kompaniialardaǧy aksiialar men qatysu ülesterı, temırjol joldar men aqşalai qarajat, şeteldık mülıkterımen qosa) qaitardy.
