Memleket basshysy elimizdegi sý tasqynyna baılanysty shuǵyl keńes ótkizdi, dep habarlaıdy “Adyrna” ulttyq portaly Aqordaǵa siltep.
Prezıdent Qasym-Jomart Toqaev elimizdiń birqatar óńirinde bolǵan sý tasqyny saldarynan týyndaǵan tótenshe jaǵdaıǵa baılanysty shuǵyl keńes ótkizdi.
“Jıynǵa Premer-Mınıstr Oljas Bektenov, Úkimet músheleri, Prezıdent Ákimshiliginiń basshylyǵy jáne basqa da laýazymdy tulǵalar qatysty. Memleket basshysyna aımaqtardaǵy qazirgi qalyptasqan ahýal týraly, atap aıtqanda, adamdardy qutqarý jáne sý tasqynynyń saldaryn joıý úshin qabyldanyp jatqan sharalar jóninde baıandaldy” delingen habarlamada.
Prezıdent Úkimet pen ákimderdiń jumysyn nemquraıly jáne kásibı mindetine sáıkes kelmeıdi dep synǵa aldy. Onyń aıtýynsha, Úkimet pen jergilikti atqarýshy organdardyń arasynda júıeli baılanys bolmaǵan.
“Qasym-Jomart Toqaev zardap shekken óńirler turǵyndaryna úlken kólemde shyǵyn kelýine baılanysty ókinish bildirdi. Memleket basshysy qalyptasqan jaǵdaıǵa baılanysty keshirim surap, barlyq azamatqa kómek kórsetiletinin aıtty. Jıyn barysynda Prezıdent sý tasqynyna qarsy ýaqytyly shara qabyldamaǵany úshin Premer-Mınıstrdiń birinshi orynbasary Roman Sklıarǵa, Sý resýrstary jáne ırrıgaııa mınıstri Nurjan Nurjigitovke qatań sógis, Aqtóbe, Qostanaı, Batys Qazaqstan oblystarynyń ákimderine qatań sógis jáne qyzmettik mindetterine tolyq saı kelmeýine baılanysty eskertý berdi. Al Atyraý, Aqmola, Almaty, Pavlodar jáne Abaı oblystarynyń ákimderine qatań sógis jarııalandy” dep jazdy Aqorda saıty.
Eske sala keteıik, buǵan deıin Tótenshe jaǵdaı mınıstri eki ret aýystyrylǵan. Byltyr maýsym aıynda Semeı ormandaryndaǵy órtke baılanysty Iýrıı Ilın qyzmetinen bosatylǵan bolatyn. Onyń ornyna taǵaıyndalǵan Syrym Sháriphanov ta bıyl qyzmetinen bosatylǵan. Alaıda olarǵa tártiptik shara qarastyrylmaǵan.
