Aqtóbe oblysyndaǵy túgeldeı sýǵa ketken Bersıev aýylynda qalǵan 250 adam tikushaqpen evakýaııalandy, dep habarlaıdy "Adyrna" ulttyq portaly Qorǵanys mınıstrliginiń baspasóz qyzmetine siltep.
«29 naýryzda Qazaqstan Respýblıkasy Qarýly Kúshteri Áýe qorǵanysy kúshteriniń Mı-8 tikushaǵynyń ekıpajy maıor J.O.Bekbáýlıevtiń basqarýymen sý tasqynynda tótenshe jaǵdaıda qalǵan adamdardy qutqarý boıynsha evakýaııalaý sharalaryna qatysty. Aqtóbe oblysy Oıyl aýdany Bersıev aýylyndaǵy aımaqtyń adamdary tasymaldandy», - dep habarlady Qorǵanys mınıstrligi.
Buǵan deıin BAQ-ta Bersıev aýylyndaǵy mektepti evakýaııalaý pýnktinde 250-ge jýyq adam jatqany habarlanǵan bolatyn. Turǵyndardyń aıtýynsha, tikushaq birneshe ýaqyt qonatyn jer tappaı, qaıta ushyp ketken.
Qorǵanys mınıstrliginen bizge habarlaǵandaı, mektep aınalasy shynymen de sýǵa tolyp, qonýǵa múmkindik bolmaǵan. Oryn tańdap alǵan brıgada mektep ǵımaratynan 600-800 metr jerge turaqtady. Sondaı-aq ol jerde basqa ǵımarattyń tóbesinde 15-ten astam adam jatqany jáne olardyń ómirine birden qaýip tónip turǵany týraly aqparat túsken.
«Ekıpaj komandıri aldymen ǵımarattyń tóbesinde birden qaýip tóngen adamdardy qutqarýdy sheshti. Ǵımarattyń ústinde 1 metr bıiktikte kóterilgen barlyq adamdar aman-esen qutqaryldy. Sol kezde qalǵan janar-jaǵarmaıdy esepke alyp, tikushaq qutqarylǵan adamdardy Aqtóbege jetkizip, janarmaı quıyp, aýylǵa qaıta ushty», - dep túsindirdi departamenttegiler.
Belsendiler Bersıev aýylyndaǵy jaıtqa baılanysty dabyl qaǵýda. Olar eshqandaı daıyndyqtyń joǵyn aıtyp, kómekke ketken qoǵam belsendilerinen atalmysh aýyldy nazarsyz qaldyrmaýdy suraýda.
"Aqtóbe oblysyndaǵy Sh. Bersıev aýyly túgel sýǵa ketti. Aýyldaǵy 1200 adamdy mektepke ákelip ornalastyrǵan. Biraq birinshi qabaty malmandaı bolǵan bilim oshaǵynyń qabyrǵalary qaq aıyrylyp, shytynap jatyr eken. Janyn shúberekke túıgen jurt ekinshi qabatynda qysylysyp jatyr. Elý jyl buryn salynǵan eski mektep ylǵalǵa shydamaı qulasa, bir aýyldyń halqy túgel qyrylady. Qudaı saqtasyn mundaıdan. Biraq bir aptadan beri bolyp jatqan tasqynǵa túk daıyndyq joq. Ne tamaq ne jatyn oryn ne qutqarýshy ne qaıyq joq. Keıbir turǵyndar shatyrda qalǵan. Aýylda tikushaq qonatyn qurǵaq jer joq. Oıyldyń halqyna shuǵyl kómek kerek. Bersıevke de baryńyz" dep jazdy belsendi Dıas Nuraqyn.
