Qazaqstan Prezıdenti Qasym-Jomart Toqaev Qytaıda BUU-nyń burynǵy Bas hatshysy Pan Gı Mýnmen kezdesti. Bul týraly Aqorda málimdedi, dep habarlaıdy “Adyrna” ulttyq portaly.
«Memleket basshysy BUU-nyń segizinshi Bas hatshysy, Boao Azııa forýmynyń tóraǵasy, Jahandyq jasyl ósý ınstıtýty (GGGI) Assambleıasynyń prezıdenti Pan Gı Mýnmen kezdesti», - delingen beısenbi kúni habarlamada.
Pan Gı Mýnǵa Boao forýmyna qatysýǵa shaqyrǵany úshin alǵys bildire otyryp, Toqaev onyń BUU Bas hatshysy retindegi álemdik qoǵamdastyq aldyndaǵy eleýli qyzmetterin atap ótti.
« Meniń pikirimshe, Siz Birikken Ulttar Uıymy tarıhyndaǵy eń úzdik bas hatshylardyń biri retinde qyzmet ettińiz. Eki jarym jyl Sizdiń jetekshiligińizben jumys isteý men úshin keremet kezeń ári zor mártebe boldy», – dedi Prezıdent.
Óz kezeginde Pan Gı Mýn Qasym-Jomart Toqaevtyń halyqaralyq yntymaqtastyqty damytýǵa eleýli úles qosqanyn aıtty.
«Siz Qazaqstan Prezıdenti retinde óńirdegi beıbitshilik pen kelisimdi saqtaýǵa, adamzat pen BUU-nyń múmkindikterin keńeıtýge belsendi atsalysyp kelesiz. Meniń oıymsha, Qazaqstan Shyǵys pen Batys arasyndaǵy asa mańyzdy kópir rólin atqaryp otyr. Siz Shyǵys pen Batystyń ahýalyn jaqsy túsinesiz. Bul rette tájirıbeńiz mol”, – dedi Koreıa dıplomaty.
Kezdesýde halyqaralyq kún tártibindegi ózekti máseleler, onyń ishinde BUU-nyń jahandyq syn-qaterlerdi tıimdi eńserýdegi róli talqylandy.
«Prezıdent Qazaqstannyń halyqaralyq bastamalary týraly aıtty. Bas Assambleıanyń 79-sessııasy aıasynda Qazaqstan Franııamen birlesip «Bir sý» sammıtin ótkizýdi josparlap otyr. Sonymen qatar, 2026 jyly Astanada aımaqtyq klımattyq sammıt uıymdastyrylady. Memleket basshysy Pan Gı Mýndy basty spıkerlerdiń biri retinde aldaǵy Astana halyqaralyq forýmyna qatysýǵa shaqyrdy», - dep tolyqtyrdy Aqorda.
Aıta ketsek, Pan Gı Mýn – 2007 jylǵy 1 qańtar – 2016 jylǵy 31 jeltoqsan aralyǵy BUU-nyń 8-shi Bas hatshysy boldy. 2011 jylǵy naýryzda Toqaev BUU Bas hatshysynyń orynbasary, BUU-nyń Jenevadaǵy bólimshesiniń Bas dırektory, sondaı-aq BUU Bas hatshysynyń qarýsyzdaný jónindegi konferenııadaǵy jeke ókili bolǵan bolatyn.
